استانادا يلين مەن پودوبەدوۆانىڭ ءىزباسارلارى تارتىسقا ءتۇسىپ جاتىر

استانا. قازاقپارات - استانادا حالىقارالىق بالالاردى قورعاۋ كۇنى اياسىندا اۋىر اتلەتيكادان تۋرنير باستالدى.

بۇل سايىستا استانا قالاسى، اقمولا، سولتۇستىك قازاقستان جانە قاراعاندى وبلىستارىنان ەڭ تومەنگى جاس ارالىعىنداعى (1999-2000 - جىلى تۋعاندار جانە بۇدان دا كىشىلەر) اۋىر اتلەتتەر تارتىسقا تۇسۋدە.

جارىستىڭ بارلىق قاتىسۋشىلارىنا مەدالدەر مەن ديپلومدار، سونداي-اق باعالى سىيلىقتار تابىستالماق. سونىمەن قاتار تۋرنيردەن كەيىن جاس سپورتشىلاردى استانانىڭ كورىكتى جەرلەرىندە سەرۋەندەتۋ شاراسى جوسپارلانىپ وتىر.

«بۇگىن بالالار توعىز سالماق دارەجەسى بويىنشا باقتارىن سىنايدى. تۋرنيردىڭ باستى ماقساتى - اۋىر اتلەتيكانى جانە سپورتتى قازاقستاندا كەڭىنەن ناسيحاتتاۋ. لوندونداعى وليمپيادانىڭ قورىتىندىسى بويىنشا جەتى التىن جۇلدەنىڭ تورتەۋى اۋىر اتلەتتەرىمىزدىڭ ەنشىسىندە بولدى. سپورتتىڭ وسى ءتۇرى بويىنشا جوعارى تالاپتار قويىلۋدا جانە ءبىز بۇل ناتيجەنى كەلەسى وليمپياداعا دەيىن ۇستاپ تۇرۋعا تالپىنامىز»، - دەدى اۋىر اتلەتيكا فەدەراتسياسىنىڭ ۆيتسە-پرەزيدەنتى گەنناديي موروزوۆ.

سونىمەن قاتار ول سپورتتىڭ وسى ءتۇرى بويىنشا دايىندالىپ جۇرگەن سپورتشىلارعا قاجەتتى قۇرال-جابدىقتار جاڭارتىلعانىن اتاپ ءوتتى.

ونىڭ سوزىنە قاراعاندا، ەلىمىزدىڭ ءار وبلىسىندا وڭىرلىك فەدەراتسيالار اشىلىپ، باپكەرلەر مەن سپورت مەديتسيناسى قىزمەتكەرلەرىنە جاعداي جاسالدى.

اۆتور: رۋسلان عابباسوۆ