فۋتبول: يسپانيا دەپۋتاتتارى الەم چەمپيوناتىندا قۇراما جەڭىسى ءۇشىن تولەنەتىن سىياقى كولەمىن سىنعا الدى

استانا. قازاقپارات - يسپانيا پارلامەنتىنىڭ دەپۋتاتتارى برازيلياداعى الەم چەمپيوناتىندا قۇراما فۋتبولشىلارى جەڭىسكە جەتكەن جاعدايدا ولارعا تولەنەتىن سىياقى كولەمىن سىنعا الىپ وتىر.

اتاپ ايتقاندا، دەپۋتاتتار يسپانيا قۇراماسىنىڭ فۋتبولشىلارى وتكەن جولعىداي چەمپيوناتتى جەڭسە، ءار ويىنشىعا 720 مىڭ ەۋرو (980 مىڭ دوللار) كولەمىندە بونۋس تولەنەدى دەگەن حابارلاماعا نارازىلىق بىلدىردى. 2010 - جىلعى الەم چەمپيوناتىندا يسپاندىق فۋتبولشىلارعا 600 مىڭ ەۋرودان بەرىلگەن ەدى.

پارلامەنتاري حوسەپ ەنتوني دۋران Twitter-دەگى پاراقشاسىندا يسپانيا چەمپيوندىق تيتۋل ءۇشىن ءوزىنىڭ قۇراماسىنا گەرمانيا فۋتبولشىلارىنا قاراعاندا ەكى ەسەدەن استام سىياقى بەرىتىنىن اتاپ وتكەن.

«سوندا ءبىز گەرمانيادان ەكى ەسەگە باي بولعانىمىز با؟» - دەپ تاڭدانىپ وتىر ول.

ماسەلەن، گەرمانيا قۇراماسىنىڭ ويىنشىلارى الەم بىرىنشىلىگىندە جەڭىسكە جەتسە، ءارقايسىسى 300 مىڭ ەۋرودان الادى ەكەن.

ايتا كەتەيىك، يسپانيا ەكونوميكاسى 2008 - جىلعى الەمدىك قارجى داعدارىسىنان كەيىن ءالى كۇنگە دەيىن قالپىنا كەلە الماي جاتىر. بۇل ەلدە جۇمىسسىزدىق دەڭگەيى جوعارى دەڭگەيگە جەتتى، ياعني وتكەن جىلعى ءبىرىنشى توقساندا 27 پايىزدان اسىپ ءتۇستى.

فۋتبولدان الەم چەمپيوناتى 12 - ماۋسىم مەن 13 - شىلدە ارالىعىندا برازيليانىڭ 12 قالاسىندا وتەدى. دۇبىرلى دودانى ريو-دە-جانەيرو، رەسيفي، سالۆادور، سان-پاۋلۋ، پورتۋ-الەگري، ماناۋس، فورتالەزە، ناتال، بەلۋ-وريزونتي، برازيليا، كۋيابا جانە كۋريتيبە قالالارى قابىلدايدى. الەم بىرىنشىلىگىنە 32 كوماندا قاتىسادى.

اۆتور: رۋسلان عابباسوۆ