قازاقستان اقشىل مۇناي ونىمدەرىنە ەكسپورتتىق كەدەندىك باجدى ارتتىرادى

استانا. قازاقپارات - بۇگىن پارلامەنت سەناتى ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسى بولىپ ءوتتى.

وندا «2010 - جىلى 9 - جەلتوقساندا قازاقستان رەسپۋبليكاسىنىڭ ۇكىمەتى مەن رەسەي فەدەراتسياسى ۇكىمەتى اراسىنداعى قازاقستان رەسپۋبليكاسىنا مۇناي جانە مۇناي ونىمدەرىن جەتكىزۋ سالاسىنداعى ساۋدا- ەكونوميكالىق ىنتىماقتاستىق تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى تالقىلاندى.

توقتالا كەتەتىن جايت، قازاقستان مەن رەسەي اراسىنداعى قازاقستانعا مۇناي جانە مۇناي ونىمدەرىن جەتكىزۋ سالاسىنداعى ساۋدا- ەكونوميكالىق ىنتىماقتاستىق تۋرالى كەلىسىمگە وزگەرىستەر ەنگىزىلگەن حاتتاما 2013 - جىلدىڭ 24 - جەلتوقسانىندا ماسكەۋدە جاسالعان بولاتىن.

حاتتامانىڭ نەگىزگى ماقساتى قازاقستاننىڭ 2012-2013 - جىلدار ارالىعىندا رەسەيگە مۇناي جەتكىزۋ جونىندەگى مىندەتتەمەلەرىن ورىنداۋدى اياقتاپ، پاۆلودار مۇناي- حيميا زاۋىتىن رەسەيلىك مۇنايمەن قامتاماسىز ەتۋ، سونداي- اق قازاقستاننىڭ ىشكى نارىعىن تۇتىنۋدى جابۋعا قاجەتتى مولشەردە رەسەيدە وندىرىلگەن جوعارى وكتاندى بەنزيندەرمەن جانە اۆياكەروسيندەرمەن ۇزدىكسىز قامتاماسىز ەتۋ بولىپ تابىلادى. بۇل رەتتە 2014 - جىلدىڭ 1 - قاڭتارىنان باستاپ قازاقستانعا جەتكىزىلگەن مۇناي ونىمدەرى ءۇشىن رەسەيگە مۇنايدى قارسى جەتكىزۋ جۇزەگە اسىرىلمايتىنى قاراستىرىلعان.

 حاتتاماعا سايكەس، 2012 - جىلدىڭ 1 - قاڭتارىنان باستاپ 2013 - جىلدىڭ 31 - جەلتوقسانىنا دەيىنگى كەزەڭدە قازاقستان رەسپۋبليكاسىنا اكەلىنگەن مۇناي ونىمدەرى ءۇشىن رەسەي فەدەراتسياسىنا مۇناي جەتكىزۋ ءتارتىبى قازاقستانعا اكەلىنەتىن مۇناي ونىمدەرى ءۇشىن رەسەي فەدەراتسياسىنا مۇناي جەتكىزۋ ادىستەمەسىمەن بەلگىلەنگەن.

سونىمەن قاتار، حاتتامانىڭ ەرەجەلەرىنە سايكەس، قازاقستان 2014 - جىلعى 31 - جەلتوقسانعا دەيىن اقشىل مۇناي ونىمدەرىنە ەكسپورتتىق كەدەندىك باجداردى ارتتىرادى جانە 2014 - جىلعى 1- قاڭتاردان باستاپ كەدەن وداعىنىڭ كەدەن اۋماعىنان تىسقارى جەرلەرگە اقشىل مۇناي ونىمدەرىنىڭ اكەتىلۋىنە تىيىم سالىنادى. ال رەسەي فەدەراتسياسى 2014 - جىلعى 1- قاڭتاردان باستاپ قازاقستان رەسپۋبليكاسىنا رەسەي فەدەراتسياسىنان جەتكىزىلەتىن مۇناي ونىمدەرىنە كەدەندىك دەكلاراتسيالاۋدى بەلگىلەيدى جانە قازاقستان رەسپۋبليكاسىنا رەسەي فەدەراتسياسىنان قوشقىل مۇناي ونىمدەرىن اكەلۋگە تىيىم سالادى.

زاڭ جوباسى پالاتانىڭ جالپى وتىرىسىنا شىعارىلاتىن بولادى.

اۆتور: قانات مامەتقازى ۇلى