اۋدارىسپاقتان العاشقى ازيا چەمپيوناتى ەلوردادا وتەدى
بۇل تۋرالى ق ر ۇلتتىق سپورت تۇرلەرى قاۋىمداستىعىنان حابارلادى.
وسىعان بايلانىستى، 14 - ماۋسىمدا قازمەديا ورتالىعىندا (ق م و) ازيا چەمپيوناتىنىڭ باسپا ءسوز ءماسليحاتى مەن پالۋانداردىڭ تانىستىرىلىمى وتەدى.
بايراقتى باسەكەگە 11 مەملەكەتتىڭ قۇرىش قولدى، تاقىمى تاستاي پالۋاندارى قاتىسۋعا نيەت ءبىلدىرىپ وتىر. بۇل جوبا قىتاي، رەسەي، تۇركيا، ۆەنگريا، اۋعانستان، قىرعىزستان، تاجىكستان، وزبەكستان، ازەربايجان، موڭعوليا جانە قازاقستاننىڭ سايدىڭ تاسىنداي ىرىكتەلگەن سپورتشىلارى اراسىنان ازيا قۇرلىعىنداعى اۋدارىسپاقتان ەڭ مىقتى پالۋاندى انىقتايدى.
چەمپيونات 70 كەلىگە دەيىن، 90 كەلىگە دەيىن جانە 90 كەلىدەن جوعارى سالماق دارەجەلەرى بويىنشا وتەدى. جارىس سوڭىندا جۇلدە العان پالۋاندار ابسوليۋتتى چەمپيون اتاعىن ساراپقا سالاتىن بولادى.
اۋدارىسپاق - سالت اتتىلاردىڭ ءبىرىن- ءبىرى ەر ۇستىنەن اۋدارىپ الۋعا تىرىساتىن قازاقتىڭ ۇلتتىق سپورت ءتۇرىنىڭ ءبىرى. ات ۇستىندە كۇرەسە ءبىلۋ ءۇشىن سپورتشىدان كۇشتىلىك، ەپتىلىك، توزىمدىلىك پەن باتىلدىق تالاپ ەتىلەدى.
