00:16, 08 - ماۋسىم 2014 | GMT +5
قازاقستاندا سابەت وداعى كەزىندەگى تاجىريبە پايدالانىلماق
استانا. قازاقپارات - قازاقستانداعى ىشكى تۋريزمدى دامىتۋدا بۇرىنعى ك س ر و- نىڭ تاجىريبەسى پايدالانىلماق. بۇل تۋرالى «تۋريزم كۇنىن قولداۋ» تاقىرىبىنداعى دوڭگەلەك ۇستەلدە يندۋستريا جانە جاڭا تەحنولوگيالار مينيسترلىگىنىڭ تۋريزم يندۋسترياسى كوميتەتىنىڭ ءتوراعاسى مارات يعاليەۆ ءمالىم ەتتى.
وسى ورايدا ول تۋريستىك جولدامانىڭ 80 پايىزىن كاسىپورىن تولەسە، ال قالعانىن جۇمىسشىنىڭ ءوزى وتەۋى ءتيىس ەكەنىن ايتتى.
«بۇل كەڭەستىك كەزدەگى جاقسى تاجىريبە. وسى ورايدا ەڭ باستىسى - بۇل جولدامالار تەك سارى اعاش، بۋراباي، كاسپي تەڭىزى سەكىلدى قازاقستاندىق دەمالىس ورىندارىنا عانا ارنالۋى كەرەك. بىرىنشىدەن، ادام دەمالادى، كاسىپورىن ازاماتتى ساناتوريگە جىبەرەدى. ەكىنشىدەن، ءبىز ەلىمىزدىڭ ىشكى تۋريزمىن دامىتامىز» ، - دەيدى ول.
كوميتەت باسشىسىنىڭ ايتۋىنشا، وسى تەكتەس تۋريستىك سەرتيفيكاتتاردى دامىتۋ زاڭنامالىق تۇرعىدا بەكىتىلەدى.
م. يعاليەۆ الداعى جىلى كوميتەت وسى باستامانى ەسكەرە وتىرىپ، «ارنايى تۋريستىك ايماقتار تۋرالى» زاڭدى ازىرلەۋدى باستايتىندىعىن اتاپ ءوتتى.
اۆتور: رۋسلان عابباسوۆ
