ۋكراينا رەسەيمەن اراداعى شەكاراسىن جاۋىپ تاستادى

استانا. قازاقپارات - ۋكراينا رەسەي ءۇشىن دونەتسك پەن لۋگانسك وبلىستارىنداعى شەكاراسىن جاۋىپ تاستادى. بۇل جايىندا ر ف سىرتقى ىستەر مينيسترلىگىنەن حابارلادى.

«6 - ماۋسىمدا ر ف س ءى م ۋكراينا س ءى م- نىڭ اعىمداعى جىلعى 5 - ماۋسىمداعى نوتاسىن الدى.

 وندا سەبەبى تۇسىندىرىلمەستەن ۋكرايندىق تاراپتىڭ ۋكراينا مەن رەسەي فەدەراتسياسى اراسىنداعى مەملەكەتتىك شەكارا ارقىلى قوزعالىسقا شەكتەۋ قويىلاتىندىعى ايتىلعان» ، - دەلىنگەن حابارلامادا.

رەسەي سىرتقى ىستەر مينيسترلىگى تاراتقان اقپاراتقا سايكەس، ۋكراينانىڭ دونەتسك پەن لۋگانسك وبلىستارى مەن رەسەيدىڭ روستوۆ وبلىستارى اراسىندا ورنالاسقان مارينوۆكا - كۋيبىشيەۆو، دولجانسكيي - نوۆوشاحتينسك، چەرۆونوپارتيزانسك - گۋكوۆو، كراسنايا موگيلا - گۋكوۆو، نوۆوبوروۆتسى - الەكسەيەۆو- تۋزلوۆكا، كراسنودارسكيي - دونەتسك، كراسنودارسكيي - نيجنيي شۆىريەۆ، سيەۆەرنىي - دونەتسك وتكىزۋ بەكەتتەرى جابىلعان.

***

ۋكراينانىڭ شەكارا كۇزەتى قىزمەتى 5 - ماۋسىم كۇنى ەلدىڭ شىعىسىندا رەسەيمەن شەكارادا بولعان قاقتىعىستا 15 رەسەيشىل سەپاراتيستىڭ قازا تاپقانىن حابارلادى. سەپاراتيستەردىڭ بىرنەشە كولىگى قيراتىلعان.

 شەكارا قىزمەتى 6 - ماۋسىمدا تاراتقان حابارلاماسىندا ۋكراين اسكەرى مەن سەپاراتيستەر اراسىنداعى اتىس 5 - ماۋسىم كۇنى كەشكە دونەتسكىدەن شىعىسقا قاراي 95 كيلومەتر جەردەگى مارينوۆكا قالاسىندا بولعانىن ايتادى. اتىستان ۋكراينالىق 5 سارباز جارالانعان.

قاقتىعىستاردان سوڭ ۋكراينا ۇكىمەتى رەسەيمەن شەكاراداعى بىرنەشە بەكەتتى جابۋعا بۇيرىق بەرگەن. ۋكراينا سەپاراتيستىك جاساقتار رەسەي شەكاراسى جاعىنان شابۋىلداعانىن ايتادى.

رەسەي سىرتقى ىستەر ءمينيسترى شەكارا بەكەتتەرىنىڭ جابىلعانىنا نارازىلىق ءبىلدىردى.

 سولتۇستىك كاۆكازداعى (رەسەي) ينگۋشەتيا رەسپۋبليكاسىنىڭ باسشىسى يۋنۋسبەك ەۆكۋروۆ ۋكراينانىڭ شىعىسىنداعى دونەتسك پەن لۋگانسك وبلىستارىندا سوعىسىپ جاتقان رەسەيشىل سەپاراتيستەر اراسىندا «ينگۋش ەرىكتىلەرى دە بار» ەكەنىن مالىمدەدى.

 

ەۆكۋروۆتىڭ ايتۋىنشا، سەپاراتيستەر قاتارىندا 20-25 ينگۋش ەرىكتىلەرى ءجۇر. ول ۋكراين اسكەرىمەن قاقتىعىستاردا كەمىندە ءتورت ينگۋش ازاماتى قازا تاپقانىنان حاباردار ەكەنىن ايتتى.

ونىڭ سوزىنشە، ينگۋش جاساقتارى ۋكرايناعا ينگۋشەتيادان ەمەس، رەسەيدىڭ وزگە ايماقتارىنان بارعان.

ۋكراينا اقپارات قۇرالدارى ەلدىڭ شىعىسىندا ۇكىمەت اسكەرىنە قارسى سوعىسىپ جۇرگەن رەسەيشىل سەپاراتيستەر قاتارىندا «شەشەن، ينگۋش جانە وسەتيندەر بار» ەكەنىن ايتقان.