سيرياعا قازاق ازاماتتارىنىڭ اتتانۋىنىڭ سەبەپتەرىنە ءمان بەرۋ كەرەك - ەرلان قارين

استانا. قازاقپارات -  سيرياعا كەتىپ جاتقان ازاماتتار كەيىن قازاقستانعا ورالعاندا قاۋىپ ءتوندىرۋى ىقتيمال. كەشە استانادا ەكسترەميزم مەن لاڭكەستىككە قارسى ارەكەت جونىندەگى دوڭگەلەك ۇستەلدە ساياساتتانۋشى ەرلان قارين وسىلاي ءمالىم ەتتى.
None
None

«سوندىقتان بۇل ازاماتتار نە ءۇشىن كەتىپ جاتىر جانە ولاردى وسىعان قانداي فاكتورلار يتەرمەلەپ جاتىر؟ نەگە بۇل ازاماتتار ءوز ەلدەرىندەگى ءومىردى تاستاپ، وتباسىلارىمەن باسقا ءارى تۇسىنىكسىز، سونداي- اق بىزگە قاجەت ەمەس قۇندىلىقتار ءۇشىن قۇرباندىققا سالىنۋدا؟

  ارينە، بۇل ەلگە كەتىپ جاتقان ازاماتتار كەيىن قازاقستانعا ورالعاندا قاۋىپ ءتوندىرۋى ىقتيمال. بۇل تۇرعىدا سيرياعا كەتىپ جاتقان ازاماتتاردىڭ سەبەپتەرىن انىقتاۋ كەرەك. كەيبىرى سانالى تۇردە قارۋلى قاقتىعىسقا قاتىسۋ ءۇشىن بارسا، كەيبىرى الدانىپ ءتۇسىپ قالادى، قالعانى باسقا سەبەپتەرمەن اتتانىپ جاتقاندىعى ءسوز بولۋدا» ، - دەدى ە. قارين.

«وكىنىشكە قاراي، سيرياعا ازاماتتار بارىپ جاتقانى راس. ءبىراق، بۇل تاقىرىپتا جالعان اقپاراتتاردى ەلەپ- ەكشەۋ كەرەك. بىرەۋلەر اسىرىپ، ەشقانداي ناقتى دەرەكتەرگە جۇگىنبەستەن قازاقستاننان 500 ازامات باردى دەپ ايتۋدا. بۇلاي ەش دايەكسىز زەرتتەۋ جۇرگىزبەي، اقپاراتتى تاراتۋ ورىنسىز» ، - دەپ توقتالدى ساراپشى.

ساياسات تانۋشىنىڭ سوزىنە قاراعاندا، قازىرگى ۋاقىتتا شىن مانىسىندە سيريادا ەشقانداي دا ازاماتتىق سوعىس ەمەس، ياعني ءبىر ەلدىڭ اۋماعىن ءار ءتۇرلى قارۋلى توپتار ءوزارا ءبولىپ الىپ، ءبىر- بىرىمەن قاقتىعىسىپ جاتىر. «اتاپ ايتقاندا، بۇل جەردە ۇكىمەت اسكەرى مەن وپپوزيتسيالىق كۇشتەر سوعىسىپ جاتقان مايدان جوق. بۇل جاعدايدىڭ قالىپتاسۋىنا سىرتقى كۇشتەر اسەر ەتتى، ناقتىراق ايتقاندا الىپ مەملەكەتتەردىڭ سيرياداعى ىشكى قاقتىعىسقا ارالاسۋىنان پايدا بولدى» ، - دەدى ە. قارين.

ونىڭ پايىمىنشا، كەيبىر باتىس جانە كورشىلەس ەلدەر سيرياداعى ءتۇرلى قارۋلى راديكالدى توپتارعا قولداۋ جاساۋدا.

«باسقا ەلدەردەن، ونىڭ ىشىندە ت م د جانە ورتالىق ازيادان اتالعان مەملەكەتكە بارىپ جاتقان ازاماتتار ەڭ سوڭىندا وسى ءار ءتۇرلى توپتاردىڭ قۇرامىنا ەنىپ، شىن مانىسىندە ءوزارا سوعىسىپ جاتىر. بۇل توپتاردىڭ اراسىنداعى قاقتىعىستىڭ نەگىزگى سەبەبىنە توقتالاتىن بولساق، وندا جاۋلاپ العان ەلدى مەكەندەردە باقىلاۋ ورناتۋ، قارجى كوزىنە جانە سوعىس كەزىندە يەلىك ەتكەن ولجانى باسىپ قالۋعا بايلانىستى» ، - دەدى ساياساتتانۋشى.

اۆتور: رۋسلان عابباسوۆ

سوڭعى جاڭالىقتار