ۇشاق بورتىندا قازاق ءمازىرى نەگە جوق؟
سوعان بايلانىستى شىعار، اۋە كەمەلەرىمەن جۇرەتىن جولاۋشىلاردىڭ كوپشىلىگى ۇشاق بورتىندا قازاقتىڭ ۇلتتىق تاعامدارى نەگە ۇسىنىلمايتىنىن سۇراپ جاتادى. كەشە الماتىدا «ەير استانا» اۋەكومپانياسى بورت مازىرىمەن، سۋسىندارىمەن تانىستىرىپ، كوپشىلىكتىڭ كوكەيىندە جۇرگەن وسى سۇراققا جاۋاپ بەردى.
تانىستىرۋ راسىمىنە «ەير استانا» ا ق پرەزيدەنتى پيتەر فوستەر، «ەير استانا» ا ق باس اسپازى ريچارد حايلەند، الماتىلىق بورتتا ۇسىنىلاتىن تاعامدار تسەحىنىڭ باس اسپازى روي ەندجي، «ەير استانا» ا ق كەيتەرينگ- مەنەدجەرى لوران مۋسسار قاتىستى. قوناقتارعا «ەير استانا» بورت ءمازىرىنىڭ ءدامىن تاتىپ، باعالاۋ، سونىمەن قاتار فرانتسۋز جانە يتاليان شاراپتارىنىڭ ءدامىن بايقاۋ ۇسىنىلدى.
ءدامدى تاعام، ادەمى جاسالعان داستارحان، بىلىكتى اسپازدار - الدىڭعى قاتارلى اۆياكومپانيالاردىڭ ۇزدىك قىزمەتىنىڭ ءبىر بولىگى. ءاربىر رەيستىڭ اس ءمازىرى ونىڭ باعىتىنا، ۇشۋدىڭ ۇزاقتىعىنا جانە رەيستى اتتاندىرۋ ۋاقىتىنا بايلانىستى ءارتۇرلى بولادى. ونى كليەنتتەردىڭ كۇتۋىنە قاراي باس اسپازشىلار مەن كەيتەرينگ- مەنەدجەرلەر بەلگىلەيدى. تاعامدارعا ءارتۇرلى اۋەجايلارداعى كەيتەرينگ- كومپانيالارعا تاپسىرىس بەرىلەدى. تاعامداردى ازىرلەۋ - بورت ءمازىرى تسەحىنىڭ كىشكەنتاي عانا بولىگى. بۇل، جالپى العاندا، قولدارىندا سەرتيفيكاتتارى بار جەتكىزۋشىلەردەن ساپالى ازىق- تۇلىكتەر الۋ، بارلىق ستاندارتتار مەن تالاپتاردى قاتاڭ ساقتاي وتىرىپ كۇردەلى تاسىلدەرمەن اس ازىرلەۋ، ونى پايدالانۋ، ساقتاۋ، ارنايى ىدىستارمەن تاسىمالداۋ سياقتى جۇمىستار كىرەتىن وتە كۇردەلى لوگيستيكالىق پروتسەسس.
«ەير استانا» اۋەكومپانياسى بورتىنا الىپ، قىزمەت كورسەتەتىن جولاۋشىلارىنا قازاقتىڭ ۇلتتىق تاعامدارىن ۇسىنعىسى- اق كەلەدى. ءبىراق وعان كەدەرگى بولاتىن بىرنەشە سەبەپتەر بار ەكەن. «ەير استانانىڭ» الماتىلىق بورتتا ۇسىنىلاتىن تاعامدار تسەحىنىڭ باس اسپازى، سينگاپۋرلىق روي ەندجيدىڭ ايتۋىنشا، بورت ءمازىرى بەلگىلى ءبىر تەحنولوگيامەن دايىندالادى ەكەن. تاعام تەمپەراتۋرالىق رەجيمنىڭ ساقتالۋىمەن ازىرلەنەدى، سودان كەيىن ءاربىر تاعام ءتۇرى جەكە كامەرادا توڭازىتىلادى، بورتقا جەتكىزىلەر الدىندا مۇزداتىلادى، ال ۇشاقتىڭ ىشىندە ونى جىلىتادى. بۇل پروتسەستەر كەزىندە اسپازدار تاعامنىڭ سانيتارلىق، گيگيەنالىق جاعىنا، سونداي- اق دامدىك ساپاسىن جوعالتپاۋىنا قاتتى كوڭىل بولەدى. ازىرلەنگەن تاعام 20 ساعاتتىڭ ىشىندە اسقا پايدالانىلۋى ءتيىس. بۇل - بارلىق ەلدەردىڭ اۋە كەمەلەرىندەگى ورتاق ءتارتىپ.
- اۋەكومپانياسىنىڭ بارلىق باعىتتارىنا ارنالعان «ۇشاق تاعامىنا» ءارتۇرلى ەلدەردىڭ 27 اۋەجايىندا تاپسىرىس بەرىلەدى. دەپارتامەنتتەردە جۇزدەن استام اسپازدار «ەير استانا» اۋەكومپانياسىنىڭ ۇشاقتارىنا جەتكىزىلەتىن 8-9 مىڭ ادامعا اس ازىرلەيدى. بورتقا ۇسىنىلاتىن تاعامدار - اس ازىرلەۋ عانا ەمەس، سونىمەن بىرگە، سەرتيفيكاتتارى بار جەتكىزۋشىلەردەن ساپالى ونىمدەردى قابىلداۋدى باقىلاۋ، ازىق تۇرلەرىن وڭدەۋ، پايدالانۋ جانە ساقتاۋ قاۋىپسىزدىگى، سونداي- اق سانسىز رەيستەرگە قىزمەت كورسەتۋ ءۇشىن تاۋلىك بويى جۇمىس ىستەۋ. جولاۋشىلاردىڭ تالاپتارى بويىنشا، ءدىني ۇستانىمىنا، ديەتاعا قاراپ جانە جاس بالالارعا ارناپ جاسالاتىن ارنايى ءمازىرىمىز دە بار. ال «ەت» ، «قۋىرداق» سياقتى قازاقتىڭ ۇلتتىق تاعامدارىن ازىرلەۋ جانە ساقتاۋ تەحنولوگياسى ءبىرقاتار قيىندىقتار تۋعىزادى. بۇل تاعامداردى ءپىسىرىپ، دايىنداعان بەتتە جەگەن دۇرىس، ال قوسىمشا باپتاۋدان وتكىزگەندە، بۇل استار ەرەكشە ءدامىن جوعالتادى. ال قۇرت، ىرىمشىك، تاعى باسقا ءسۇت ونىمدەرىنەن جاسالاتىن ۇلتتىق تاعامداردى بورتقا الۋعا قازاقستاندىق سانيتارلىق- ەپيدەميولوگيالىق قاداعالاۋ ورگاندارى تىيىم سالعان، - دەيدى «ەير استانا» اۋەكومپانياسىنىڭ باس اسپازى ريچارد حايلەند.
شارا سوڭىندا «ەير استانا» اۋە- كومپانياسىنىڭ پرەزيدەنتى پيتەر فوستەر: «كومپانيا جولاۋشىلاردى ساپالى تاعامدارمەن قامتاماسىز ەتۋگە تىرىسادى. اۋە كەمەسى - اسحانا نەمەسە مەيرامحانا ەمەس، جولاۋشىلار كولىگى. الايدا ءبىز جولاۋشىلاردى ساپالى، ءدامدى تاعامدارمەن قامتاماسىز ەتۋ ءۇشىن بارلىق مۇمكىندىكتەردى قاراستىرىپ وتىرمىز. جوعارى دارەجەلى اسحانا دەڭگەيىنە ساي بولۋ، تابيعي ونىمدەردى عانا پايدالانۋ، سونداي- اق تاعامداردىڭ ادەمىلىگى، ءدامى مەن پايدالىلىعى ءبىزدىڭ ءمازىرىمىزدى انىقتايتىن ماڭىزدى كريتەري بولىپ تابىلادى. سوندىقتان الەمدىك اسحانا اعىمىنان قالماۋ، جولاۋشىلارىمىزدىڭ كوڭىلىنەن شىعۋ، وسى فاكتورلارعا سايكەس «ەير استانا» تاعام اسسورتيمەنتىن تۇراقتى جاقسارتىپ وتىرۋ جوسپارىمىزداعى ماسەلەلەر بولىپ تابىلادى» دەپ اتاپ ءوتتى.
تورەجان قايىرجان
«ايقىن»
