13:17, 08 - ماۋسىم 2014 | GMT +5
بۇلىكشىلەر ءۇش اۋىلدى جويىپ جىبەردى
استانا. قازاقپارات - نيگەريانىڭ سولتۇستىك- شىعىسىنداعى بورنو شتاتىندا بوكو حارام توبىنىڭ مۇشەلەرى كەم دەگەندە 200 ادامدى قىرىپ سالدى، دەپ حابارلادى روسبالت.
اسكەر كيىم كيىپ العان بۇلىكشىلەر وق جاۋدىرىپ، ءۇش اۋىلدى تولىقتاي جويىپ جىبەردى.
جەرگىلىكتى بيلىك وكىلدەرىنىڭ ايتۋىنشا، ولار بۇلىكشىلەر شابۋىلعا دايىندالىپ جاتقاندىعى جايىندا اسكەري قىزمەتشىلەرگە ەسكەرتكەن، ءبىراق ولار كومەككە كەلمەگەن. ءارى شتات استاناسى مايدۋگۋريدە قايعىلى وقيعا تۋرالى امان قالعان شارۋالار بارىپ ايتقان كەزدە عانا، بىرنەشە كۇن وتكەننەن كەيىن ءبىر- اق بىلگەن.
ايتا كەتەيىك، «بوكو حارام» - نيگەرياداعى راديكالدىق يسلامدىق سەكتا. ولار شاريعاتتى ەلدىڭ بارلىق اۋماعىنا ەنگىزۋ، باتىستىڭ ىقپالىمەن كۇرەسۋ ماقساتتارىن كوزدەيدى.
بۇلىكشىلەر شىركەۋلەرگە، مەكتەپتەر مەن پوليتسيا ۋچاسكەلەرىنە بىرنەشە رەت شابۋىل جاساعان. 2014 - جىلعى مامىردا ب ۇ ۇ قاۋىپسىزدىك كەڭەسى «بوكو حارامدى» تەررورلىق ۇيىمدار تىزىمىنە ەنگىزگەن.
