بيىل استانادا ەلىمىزدىڭ تۇڭعىش بروندالعان اسكەري كولىكتەرى شىعارىلا باستايدى

  استانا. قازاقپارات - جىل سوڭىنا دەيىن قازاقستاندا بروندالعان اسكەري كولىكتەر شىعارىلا باستايدى. بۇل تۋرالى كەشە «قازاقستان ينجينيرينگ» ۇ ك» ا ق باسقارما ءتوراعاسى بولات سماعۇلوۆ ءمالىم ەتتى. 

كومپانيا باسشىسىنىڭ اتاپ وتكەنىندەي، كولىكتەر قازاقستاندا جاسالادى جانە ەلىمىزدىڭ قارۋلى كۇشتەرىنە ارنالادى.  

«قۇرىلىس (كولىك شىعاراتىن زاۋىتتىڭ - اۆت. ) باستالىپ كەتتى، جىل سوڭىنا دەيىن جوبا جۇزەگە اسىرىلادى دەپ جوسپارلاپ وتىرمىز» ، - دەپ اتاپ ءوتتى ول.  

ونىڭ ايتۋىنشا، جاقىن كۇندەرى قارۋلى كۇشتەردە اتالمىش كولىكتەردى سىناقتان وتكىزۋ جۇمىستارى اتقارىلماق.  

«بۇل جوبا اياسىندا ءبىز ازاماتتىق ماقساتتاعى كولىكتەردى دە شىعارۋدى كوزدەپ وتىرمىز. مۇمكىن ولار دجيپتەر نەمەسە ءورت ءسوندىرۋ كولىكتەرى بولۋى ىقتيمال. ول ماسەلە قاراستىرىلۋدا. بۇل جوباعا قاتىستى شەتەلدىك كومپانيا بىزگە بارلىق قۇجاتتاردى تاپسىرادى. بروندالعان كولىكتەر قازاقستاندىق برەند بولادى دەگەن ءسوز» ، - دەدى ب. سماعۇلوۆ.

اۆتور: جاسۇلان جولدىبايەۆ