رەسەيلىك تانىمال رەجيسسەر قازاق تىلىندە تەلەباعدارلامالار جاساۋدا
رەسەيلىك رەجيسسەر الەكساندر زامىسلوۆ قازاق جۋرناليستەرىنەن قازاق ءتىلىن ۇيرەنىپ ءجۇر. رەسەيدە تانىمال بولعان ءبىرقاتار توك- شوۋلاردىڭ رەجيسسەرى قازىر «ەۋرازيا 1» ارناسىندا بىرنەشە قازاق ءتىلدى باعدارلامالاردى جاساۋعا اتسالىسىپ ءجۇر.
رەجيسسەردىڭ ايتۋىنشا، ول نەگىزگى كۇشتى ارنانىڭ بىرەگەي قازاق ءتىلدى اۋديتورياسىن قالىپتاستىرۋعا سالىپ جاتىر. اتالعان باعىتتاعى رەجيسسەردىڭ العاشقى قادامدارى قازىر «1- ارنا ەۋرازيادان» بەرىلىپ جاتقان «101 كەڭەس» ، «مارالبەك» توك- شوۋلارىنان كورىنىس تابۋدا.
«تەليەۆيدەنيەنىڭ ءتىلى ورتاق ءتىل. ماعان ءوزىم قازاق تىلىندە تەلەباعدارلاما جاساۋعا مۇمكىندىك بەرگەنى ءۇشىن كومانداما العىسىمدى بىلدىرگىم كەلەدى. ءبىزدىڭ ارامىزدا ۇلكەن سەنىم ورناعان. ونسىز ەشقانداي ناتيجە بولماس ەدى. بولاشاقتا قازاق ءتىلىن ەركىن مەڭگەرگەننەن كەيىن بۇدان دا ۇلكەن جەتىستىككە جەتەرىمىز ءسوزسىز» ، - دەدى ا. زامىسلوۆ.
ءدال قازىر رەجيسسەردىڭ قازاقشاسىن «101 كەڭەستىڭ» جۇرگىزۋشىسى ەركەبۇلان مىرزابەك پەن مارالبەك ساعىنعان ۇستارتىپ ءجۇر.
«قازىر ول كىسى رەسەيدەن قازاقستانعا كوشىپ كەلگەن. جاقىندا ازاماتتىق الاتىن ويى بار. بەلگىلى رەجيسسەردى شاقىرتۋ «ەۋرازيا 1» ارناسىنىڭ قازاق ءتىلدى باعدارلامالارىنىڭ رەيتينگىسىن كوتەرۋ ءۇشىن جاسالعان قادام ەدى» ، - دەدى ارنانىڭ ارنايى جوبالار قىزمەتىنىڭ كرەاتيۆتى مەنەدجەرى گاۋھار الدىبەكوۆا.
ايتا كەتەرلىگى، وسى اپتادا ارنادا «ف ي ف ا: فۋتبول 14» اتتى باعدارلامانىڭ تۇساۋكەسەرى بولماق. توك- شوۋ جانرىنداعى جوبادا تەڭبىل دوپ ونەرىنىڭ باستى جاڭالىقتارى تالقىلاناتىن بولادى.
اتالعان جوبا الەكساندر زامىسلوۆتىڭ قاتىسۋىمەن تۇسىرىلگەن ءۇشىنشى باعدارلاما بولىپ وتىر.
اۆتور: گۇلميرا عوسمانالي
