موڭعول قىزدارىن مىسىمىز باسىپ، وزبەك ورىمدىلەرىنەن وكتەم تۇستىك
قازاق توپىراعىنداعى AIBA-نىڭ بۇكىلالەمدىك اكادەمياسىنا ءتورت ەلدىڭ (قازاقستان، رەسەي، وزبەكستان جانە موڭعوليا) بوكسشى قىزدارى جينالىپ، بىرلەسكەن وقۋ-جاتتىعۋ جيىنىن وتكىزۋدە. باستى ماقساتتارى - الداعى جازعى ازيا ويىندارى مەن الەم چەمپيوناتىنا دايىندالىپ، تاجىريبە الماسۋ.
ءارى تەك جاتتىعۋ جۇمىستارىن وتكىزىپ قانا قويماي، حالىقارالىق تۋرنير وتكىزىپ، بوكسشى قىزداردى شارشى الاڭداعى شىنايى جەكپە-جەكتەردە شىڭداۋعا دا قاراستىرعان.
قازاقستان - موڭعوليا - 11:2
كەشە العاشقى كەزدەسۋلەر ءوتتى. ۆاديم پريسياجنيۋك جاتتىقتىراتىن قازاقستان قىزدارى موڭعوليا قۇراماسىن 11:2 ەسەبىمەن تىزە بۇكتىردى. ال رەسەي قىزدارى 7:3 ەسەبىمەن وزبەكستان قۇراماسىنان باسىم ءتۇستى.
قازاقستان ۇلتتىق قۇراماسى ساپىندا مىنا ارۋلارىمىز جەڭىسكە جەتتى:
نازىم قىزايباي، الينا تۇرلىبايەۆا (ەكەۋى دە - 48 كەلى)، جاينا شەكەربەكوۆا (51 كەلى)، دينا جولامان (54 كەلى)، وكسانا كوروليەۆا (57 كەلى)، الۋا ءابدىرايموۆا، فەرۋزا ءشارىپوۆا (ەكەۋى دە - 60 كەلى)، زارينا تسولويەۆا (64 كەلى)، داريعا شاكىموۆا (69 كەلى)، وليمپيادا ويىندارىنىڭ قولا جۇلدەگەرى مارينا ۆولنوۆا، اناستاسيا رىلينا (ەكەۋى دە - 75 كەلى).
وكىنىشكە قاراي، جاننا باسقايەۆا (57 كەلى) جانە ۇلبوسىن المەنوۆا (60 كەلى) ءوز قارسىلاستارىنا ەسە جىبەرىپ الىپ، ۇتىلىپ قالدى.
قازاقستان - وزبەكستان - 8:0
بۇگىن قازاقستان قىزدارى وزبەكستان قۇراماسىمەن كەزدەستى. باپكەرلەر قۇرامى ازداعان وزگەرىستەر ەنگىزىپ، باسقا قىزدارىمىزعا دا مۇمكىندىك بەرسە دە، قازاقستان ارۋلارى ۇستەمدىك تانىتىپ، بارلىق جەكپە-جەكتە دە جەڭىسكە جەتتى.
اتاپ ايتقاندا، مىنا قىزدارىمىز ءوز قارسىلاستارىنان باسىم ءتۇستى:
الينا تۇرلىبايەۆا (48 كەلى)، جاينا شەكەربەكوۆا (51 كەلى)، ءسانيا سۇلتان قىزى، جاننا باسقايەۆا (57 كەلى)، گۇلجان ءۇبىنيازوۆا (60 كەلى)، سايدا حاسەنوۆا (64 كەلى)، گاۋھار ەرمەكباي (69 كەلى)، اناستاسيا رىلينا (75 كەلى).
ءبىر كوڭىل اۋدارارلىعى، تەك گۇلجان ءۇبىنيازوۆا عانا ءوز قارسىلاسىن 2:1 ەسەبىمەن ۇتتى، ال قالعان قىزدارىمىز 3:0 ەسەبىمەن باسىمدىق تانىتتى.
قازىر تالعارداعى AIBA بۇكىلالەمدىك اكادەمياسىنىڭ شارشى الاڭىندا رەسەي جانە موڭعوليا قىزدارى جۇدىرىقتاسىپ جاتىر. ال ەرتەڭ قازاقستان قىزدارى الەم جانە ەۋروپا چەمپيونى ولەسيا گلادكوۆا باستاعان ازۋلى رەسەي قۇراماسىمەن كەزدەسەدى.
