الەمدى تاڭ قالدىرعان عىلىمي جوبا وزىمىزدە قولداۋعا ءزارۋ
ەندى عالىمنىڭ جاڭالىعىنا ءۇندىستان جانە ۆەتنام مەملەكەتتەرى قىزىعۋشىلىق بىلدىرسە، ماسكەۋلىك عالىمدار نوبەل سىيلىعىنا ۇسىنىپ وتىر.
«الايدا ۇكىمەتتەن ناقتى قولداۋ بولماي وتىرعانى قىنجىلتادى»، - دەيدى اۆتور.
ابدىمالىك ءاشىروۆ، تەحنيكا عىلىمدارىنىڭ دوكتورى:
- مەنىڭ قۇرال-جابدىعىم 8 كيلوگرامدىق كەيس. ونىڭ ىشىندە مينيكومپيۋتەر، ءبىز انتەننانى شىعارىپ، ينفورماتسيا بەرەمىز تۇقىمدارعا، تومەنگى جيىلىكتى تولقىنداردا، وڭدەۋ 11 اق مينۋت.
قازىر ابدىمالىك ءاشىروۆتىڭ بۇل جاڭالىعى تۋرالى جارتى الەم بىلەدى دەسەك، قاتەلەسپەيمىز. 1991 - جىلدان بەرى كۇن نۇرىنىڭ قۇبىلىستارىنا ىرگەلى زەرتتەۋلەر جۇرگىزىپ، عالىم 2004 - جىلى ادىلەت مينيسترلىگىنەن پاتەنت العان.
بىرنەشە اۆتورلىق كۋالىكتەر دە بار. بۇرىندا اۋىل شارۋاشىلىعى سالاسىندا داقىلداردىڭ ونىمدىلىگىن ارتتىرۋ ءۇشىن كوپتەگەن تاسىلدەر بولعان. «الايدا مەنىڭ ءادىسىمنىڭ باستى ەرەكشەلىگى، ەكولوگياعا زيان كەلمەيدى، ءونىم مۋتاتسيالىق وزگەرىستەرگە ۇشىرامايدى»، - دەيدى ول. قازاقستاندا قازىر 12 ميلليون گەكتار ءار ءتۇرلى داقىلدارعا ارنالعان القاپ بار ەكەن.
ابدىمالىك ءاشىروۆ، تەحنيكا عىلىمدارىنىڭ دوكتورى:
- ەگەر سول القاپتار مەنىڭ ءتاسىلىمدى قولداناتىن بولسا، ءبىز 5-6 ميلليون توننا ءوسىم بەرۋىمىز مۇمكىن استىقتان. ول نە دەگەن ءسوز؟ ول 12 مەملەكەتتى وزبەكستان سياقتى، افريكاداعى 10 شاقتى مەملەكەتتى، ءبىز تەگىننەن تەگىن، ءبىز ەسەپتەپ كوردىك 1-1,5 ميلليارد ادامعا 1 جىلعا تاماق تاۋىپ بەرۋىمىزگە بولادى.
ەلباسىمىز بيىلعى جولداۋىندا اگروينوۆاتسيا ارقىلى قازاقستان وڭىرلىك ءىرى اۋىل شارۋاشىلىعى ونىمدەرىن ەكسپورتتاۋشىلاردىڭ بىرىنە اينالۋى ءتيىس دەگەن بولاتىن. بۇگىنگە دەيىن بيداي، قۇمىق، كۇرىش، جۇگەرى، كارتوپ، ماقتا، قىزىلشا، قيار سياقتى 11 داقىلدىڭ ونىمدىلىگى سىناقتان ءوتىپتى.
ابدىمالىك ءاشىروۆ، تەحنيكا عىلىمدارىنىڭ دوكتورى:
- ەندى ول ءازىر قۇپيا. وسى پاتەنتتى ساتپايسىز با، دەگەن ۇسىنىستار بولىپ جاتىر. ءبىراق مەن قازاق ەلىنىڭ پاتريوتى بولعاندىقتان، مەن ءىس تاجىريبەنى قازاقستاننىڭ 6 وبلىسىندا جۇرگىزدىم. ءبىراق ۇكىمەت تاراپىنان، مينيسترلىك تاراپىنان، اۋىلشارۋاشىلىعى، ءبىلىم جانە عىلىم مينيسترلىگى بار، سولاردان قولداۋ ءالى كورگەن جوقپىن. سوندىقتان ەگەر قولداۋ كورسەتپەسە، شەت مەملەكەتكە ەنگىزىپ، ساتۋىما تۋرا كەلەدى.
ماسكەۋلىك عالىمدار مۇنداي دۇنيەجۇزىلىك دەيگەيدەگى جاڭالىقتى نوبەل سىيلىعىنا ۇسىنۋ كەرەكتىگىن ايتىپتى. قازىر عالىم قۇجاتتار جيناۋ ۇستىندە. ايتپاقشى، عالىم حالىقارالىق دارەجەدەگى گروسسمەيستەر، الەمنىڭ 4 دۇركىن چەمپيونى جانسايا ابدىمالىكتىڭ اتاسى ەكەنىن دە ايتا كەتۋ كەرەك.
ازىرگە الەمگە ايگىلى عالىم وڭتۇستىك قازاقستان مەملەكەتتىك پەداگوگيكالىق ينستيتۋتىندا ەڭبەك ەتىپ جاتىر. وقۋ ورنى باسشىلارى جاقىندا زاماناۋي قۇرالدارمەن جابدىقتالعان زەرتحانا اشىپ بەرىپتى. ال وبلىستىق اكىمدىك ماقتا داقىلىنىڭ ونىمدىلىگىن ارتتىرۋعا باعىتتالعان جۇمىستارعا 30 ميلليون تەڭگە گرانت بولۋگە شەشىم قابىلداپتى. ال عالىم: «ارمانىم، بۇل جاڭالىقتىڭ قىزىعىن كۇللى قازاق حالقى كورسە ەكەن»، - دەيدى.
اۆتور: بولات كوكەناي ۇلى
«حابار» ارناسى
