ءۇش قازاقتىڭ بالاسى الەم چەمپيوناتىنا بارادى
وسىدان بىرەر كۇن بۇرىن «Coca-Cola» برەندىنىڭ باس كەڭسەسىندەگى لاۋازىمدى تۇلعالارى الەم چەمپيوناتىنىڭ اشىلۋ سالتاناتى مەن العاشقى ويىنىنا اپاراتىن جاس فۋتبولشىلارىنىڭ ءتىزىمىن بەكىتكەن. سول تىزىمگە دۇنيەجۇزىندەگى 21 ەلدىڭ عانا دارىندى جاس فۋتبولشىلارى ىلىككەن. سول 21 ەلدىڭ قاتارىندا قازاقستان جەتكىنشەكتەرى دە بار.
ءبىزدىڭ ەلگە ءۇش كۆوتا ءبولىنىپتى! ۇلتتىق قۇرامامىز الەم چەمپيوناتىنىڭ اقتىق دوداسىندا باق سىنايتىن 32 قۇرامانىڭ قاتارىندا جوق بولسا دا، ءۇش ورەنىمىز الەم چەمپيوناتىنىڭ اشىلۋ سالتاناتىنا بارادى.
ال ءۇش ۇزدىكتى قازاقستان فۋتبول فەدەراتسياسىنىڭ ۆيتسە- پرەزيدەنتى، قازاق فۋتبولىنىڭ سىرالعى ساڭلاقتارىنىڭ ءبىرى سەيىلدا بايشاقوۆ باستاعان ارنايى كوميسسيا تاڭداپ العان. بۇل كوميسيانىڭ قاتارىنا بىلىكتى ماماندار تارتىلعان.
سونىمەن الەم چەمپيوناتىنىڭ اشىلۋ سالتاناتىنا قاتىسۋ باقىتىنا تاۋكەحان ءجۇنىس، شاديار ارىنتاي جانە ايدوس پوشان يە بولدى. ۇشەۋى دە - «Coca-Cola بىلعارى دوپ» دوداسىنىڭ ەرەسەكتەر توبىنداعى ۇزدىك ويىنشىلار. تاۋكەحان مەن شاديار - تاراز فۋتبولىنىڭ تۇلەكتەرى. ال ايدوس الماتى وبلىسىنىڭ وتەگەن باتىر اۋىلىنداعى №13 مەكتەپتىڭ وقۋشىسى.
وسىعان وراي، بۇگىن الماتىدا ارنايى باسپا ءسوز جيىنى ۇيىمداستىرىلعان بولاتىن. تارازداعى تاۋكەحان مەن شاديار كەلە الماپتى. ال ۇشەۋىنىڭ اتىنان جالعىز ءوزى قاتىسىپ، ءسوز سويلەگەن ايدوس ورىس ءتىلدى باسىلىمدار كوپ بولسا دا، انا تىلىمىزدە سويلەپ، «شىنىمدى ايتسام، برازيلياعا باراتىنىما ءالى سەنە الا ەمەسپىن، وتە قۋانىشتىمىن» دەدى.
ءۇش ورەنىمىز وڭتۇستىك امەريكاعا جەكسەنبىدەن دۇيسەنبىگە اۋعان ءتۇنى ۇشادى. 9 ماۋسىمدا برازيليادا بولادى. سودان سان- پاۋلۋدىڭ ىرگەسىندەگى قالاعا ورنالاسىپ، ءار ءتۇرلى شارالارعا قاتىسادى. ءار ەلدەن جينالعان جاس فۋتبولشىلار اراسىندا كىشىگىرىم تۋرنير دە ۇيىمداستىرىلادى ەكەن.
ەڭ باستىسى، ولار 12 - ماۋسىم كۇنى الەم چەمپيوناتىنىڭ اشىلۋ سالتاناتىنا قاتىسىپ، برازيليا جانە حورۆاتيا قۇرامالارى اراسىنداعى مۋنديالدىڭ تىرناقالدى ويىنىن تاماشلايدى. ولار برازيليادا بەس كۇن بولادى.
ءارقاشان بولاشاققا سەنىممەن قاراپ، ەشقاشان ءۇمىتىمىزدى ۇزبەيتىن، ىرىمشىل حالىقپىز عوي. تاۋكەحان ءجۇنىس، شاديار ارىنتاي جانە ايدوس پوشان سىندى جاس دارىندارىمىزدىڭ دا الەم چەمپيوناتىنىڭ اشىلۋ سالتاناتىنا باراتىندىقتارىن دا جاقسىلىققا بالاپ وتىرمىز. بالكىم، وسى بالالاردىڭ بۋىنى قازاق فۋتبولىنىڭ كوسەگەسىن كوگەرتەر. وسىلاردان كەيىنگى ۇرپاقتارىمىز الەم چەمپيوناتىنىڭ اقتىق سىندارىندا دوداعا تۇسەر.. .
اۆتور: نۇرعازى ساسايەۆ
