ينديالىق «كەلىن» تەلەحيكاياسىنداعى انانديگە عاشىق قازاق جىگىتتىڭ حاتى
اكتريسا ۇلتتىق ارنانىڭ «ايەل باقىتى» ، «تۇنگى ستۋديا» «تاڭشولپان» باعدارلامالارىندا قوناق بولىپ، سۇحبات بەردى. ال جاقىندا «ايقىن» گازەتىنە اۆيكاعا عاشىق بولعان قازاق جىگىتى حات جولداپتى.
قۇرمەتتى اناندي!
مەن سەنىمەن «كەلىن» تەلەسەريالى ارقىلى تانىسپىن. سەن قۋانساڭ - قۋانىپ، مۇڭايساڭ -مۇڭايعان كۇندەرىم از بولعان جوق. سەندەر جاقتىڭ سالت-ءداستۇرى قيىنداۋ ەكەندىگى دە جانىما باتتى. تەك كينو ەكەندىگىن ويىما العاندا عانا كوڭىلىم ورنىنا تۇسەتىن.
كالياني اجەيدىڭ ءبىراۋىز سوزىن جەرگە تاستامايتىن ەلگەزەك مىنەزىڭ ماعان قاتتى ۇنادى. شىركىن، قازاقتىڭ دا بارشا كەلىنى ەنەلەرىنە وسىلايشا ىزەت كورسەتىپ، قۇرمەتتەي السا، نۇر ۇستىنە نۇر ەمەس پە؟ ايتپاقشى، قازاق حالقىنىڭ دا سالت-داستۇرىندە ەنەنى سىيلاۋ، قۇرمەتتەۋ، كەلىندى قىزىنداي كورۋ سەكىلدى قالىپتاسقان ادەت بار. وسى جاعىنان العاندا ۇلتتار اراسىندا ۇقساستىق تا بىردەن بايقالادى.
مەيلى، ول بولەك اڭگىمە. بارىنەن قىزىعى، سەنىڭ استاناعا كەلۋىڭ، جاستار ءۇشىن جاعىمدى جاڭالىق بولدى. شىنىمدى ايتسام، سەنى ءبىر كورۋ ءۇشىن استاناعا بارعىم دا كەلگەن. الايدا قايدان تابارىمدى بىلمەدىم. تىم بولماسا، قولىڭدى الىپ، جاقىننان ءبىر كورۋ ارمان بولىپ قالا بەردى.
تەلەديداردان سەنى كورگەن سوڭ، ساعان دەگەن كوڭىلىمنىڭ وزگەشە ەكەندىگىن بايقادىم. قىسقاسى، سەنى ۇناتىپ قالدىم. الايدا مەكەنجايىڭدى، تەلەفونىڭدى قايدان تابامىن؟ تاپقان كۇندە دە اعىلشىن ءتىلىن بىلمەيتىندىگىم دە قولبايلاۋ بولارى انىق.
اناندي، سەنىڭ شىن اتىڭدى دا ۇمىتىپ قالىپپىن. ءبىراق سەن ءبىز - كورەرمەندەر ءۇشىن ادەمى، ىزەتتى، اقىلدى قىزسىڭ. كورىكتى قىزدىڭ كەلبەتى مەن اقىلى ءبىرىن-ءبىرى تولىقتىرىپ تۇرۋى ءتيىس دەپ ويلايمىن. انا جاگديش دەگەن جىگىتتىڭ قاي جىلعى ەكەندىگىن بىلمەيمىن. الايدا كەلەشەكتە سوعان ۇيلەنىپ كەتەسىڭ بە دەپ تە قورقامىن...
مەن الماتىدا تۇرامىن. ستۋدەنتپىن. بولاشاق ماماندىعىم - مۇعالىم. وقۋ بىتىرگەن سوڭ سەنى قالاي دا تاۋىپ الۋعا تىرىسامىن. ەگەر سەن قازاقستانعا قونىس اۋدارار بولساڭ، ەڭ باقىتتى، ەڭ اتاقتى، ەڭ ابىرويلى اكرتيسا بولاسىڭ. بۇعان ەش كۇمانىم جوق. ال سەندەي اياۋلى قىزدىڭ جانىندا جۇرۋ - مەنىڭ ماڭگىلىك ارمانىم.
سالەممەن، قايرات قۇرال ۇلى
