ەلباسى ەگيپەتتە ابدەل فاتتاح اس- ءسيسيدىڭ باسشىلىعىمەن ساياسي تۇراقتىلىق ورناتىلاتىنىنا سەنىم ءبىلدىردى

استانا. قازاقپارات - نۇرسۇلتان نازاربايەۆ ابدەل فاتتاح اس- سيسيگە ەگيپەت اراب رەسپۋبليكاسىنىڭ پرەزيدەنتى لاۋازىمىنا سايلانۋىنا بايلانىستى قۇتتىقتاۋ جەدەلحاتىن جولدادى.

بۇل تۋرالى اقوردانىڭ باسپا ءسوز قىزمەتىنەن حابارلادى.

 مەملەكەت باسشىسى ەگيپەتتە ابدەل فاتتاح اس- ءسيسيدىڭ باسشىلىعىمەن ساياسي تۇراقتىلىق ورناپ، ورنىقتى الەۋمەتتىك- ەكونوميكالىق دامۋدىڭ قامتاماسىز ەتىلەتىنىنە سەنىم بىلدىرگەن.

«قازاقستاننىڭ ەگيپەت اراب رەسپۋبليكاسىن يسلام الەمىندەگى ماڭىزدى سەرىكتەسىنىڭ ءبىرى رەتىندە قاراستىراتىنىن جانە ەلدەرىمىز اراسىنداعى ەكىجاقتى ىنتىماقتاستىقتى ودان ءارى ارتتىرۋعا، كوپجاقتى قۇرىلىمدار اياسىنداعى ءوزارا ءىس- قيمىلدى كۇشەيتۋگە مۇددەلى ەكەنىن ايتقىم كەلەدى» ، - دەلىنگەن جەدەلحاتتا.

نۇرسۇلتان نازاربايەۆ ابدەل فاتتاح اس- سيسيگە مىقتى دەنساۋلىق، ەلدى دامىتۋعا باعىتتالعان جاۋاپتى قىزمەتىنە زور تابىس، ال باۋىرلاس ەگيپەت حالقىنا بەيبىتشىلىك پەن باق- بەرەكە تىلەدى.