شۇعىلا ساپارعالي قىزى استانالىق كورەرمەندەردى ءبىر سەرپىلتىپ تاستادى - فوتو
ال بۇگىنگى بي ونەرىنىڭ ايتۋلى وكىلى شۇعىلا ساپارعالي قىزى دەسەك، ارتىق ايتقاندىق بولماس، دەپ جازادى «ەگەمەن قازاقستان» بۇگىنگى سانىنداعى «شۇعىلا» اتتى ماقالاسىندا.
باسىلىمنىڭ اتاپ وتۋىنشە، ۇلتتىڭ بويىندا بار ۇلى قاسيەتتى سان قۇبىلتىپ ساحناعا شىعارىپ، كورگەننىڭ كوزايىمىنا اينالىپ جۇرگەن ءبيشى وتكەن سارسەنبى كۇنى «قازاعىم بارىم سەن ءۇشىن...» دەگەن سەنىممەن ەلوردا جۇرتشىلىعىن تاعى ءبىر تامساندىردى. استاناداعى «قازاقستان» كونسەرت زالىندا بىلەزىكتەي ورىلگەن ءبيدى انمەن استاستىردى. بۇرىن بۋىنسىز بيشىلىگىمەن تانىلعان شۇعىلا بۇل جولى تاڭدايىنا بال جاققانداي انشىلىگىمەن دە كوزگە ءتۇسىپ، كوڭىلگە ۇيالادى.
اسىرەسە، ايدىن-كولدىڭ ءسانى، كورگەن ادامنىڭ سەزىم وتىن شالقىتاتىن «اققۋ» ءبيى قۇس تورەسىنىڭ بۇكىل ءبىتىم-بولمىسىن ساحنادان كورسەتتى. جيىلعان حالىق ادامعا تىراشتانبايتىن شىن تالانتتى ءتاڭىرىم بەرسە، ءومىردىڭ ءوزىن دە، ونداعى تىرشىلىك يەلەرىنىڭ بولمىسىن دا ونەر تىلىندە كورسەتۋگە بولاتىنىن ءتۇيسىندى. سول ءۇشىن وعان ەرەكشە قۇرمەت كورسەتتى. بيمەن ادام بويىنداعى جۇمباقتى دا بەرۋگە بولاتىنىن، ءتىپتى، ءار قيمىلىمەن ۇعىندىرىپ وتىردى.
ايتالىق، «پاتشا قۇس»، «بورتە»، وزگە دە دۇنيەلەر، بۇعان قوسا، تورتكۇل دۇنيەدەگى جۇرتتاردىڭ تىرلىك-تىنىسىن كورسەتەتىن تۋىندىلار ەستە قالدى. كەشتىڭ ءان مەن بي، سونىمەن قاتار، ونى تولىقتىرىپ وتىراتىن ەكرانداعى كورىنىستەر ادەمى اسەرگە بولەدى. وپەرا انشىلەرى ب.بەكەنوۆ، د.جولدىبايمەن بىرگە يتاليا وپەرالارىنان ايتقان ۇزىندىلەردەگى شۇعىلانىڭ وزىندىك ماقامى ونىڭ تاعى ءبىر تالانتىن تانىتقانى انىق. وزگە جۇرتتاردىڭ، ناقتىلاي تۇسسەك، قىتاي، تۇرىك اندەرىن دە ناقىشىنا كەلتىرىپ ورىندادى. وعان قوسا، ءوزى دە ءان جازاتىنىن ەستىپ، بىلدىك.
وسى كونسەرتتە جۇرتتىڭ ەرەكشە ەسىندە قالعان ءبىر كورىنىس شۇعىلادان ءتالىم-تاربيە الىپ جاتقان ۇلبىرەگەن جاس شامالارى 8-10 جاس ارالىعىنداعى وقۋشى بيشىلەردىڭ تالپىنىسى، ۇستازىنا ۇقساپ باعۋعا تىرىسقان ۇمتىلىستارى، قيمىلدارى جاراسىپ-اق تۇردى. بولاشاق شۇعىلالار وسىلار دەگىزدى.
ونەر جۇلدىزى وتكىزگەن كەشتىڭ تاعى ءبىر ەرەكشەلىگى، ءار ءبيدى نە ءاندى ايتار تۇستا ول تۋرالى ساحنا سىرتىندا كۇمىس قوڭىراۋداي ۇندەرىنەن ۇلتتىق بولمىس مەنمۇندالاپ تۇراتىن قازاقتىڭ ايتۋلى ديكتورلارى ساۋىق جاقانوۆا مەن امانجان سەرىكوۆتىڭ مارجانداي سوزدەرىنىڭ توگىلىپ تۇرۋى دا رۋحىڭدى كوتەرىپ، سەرگىتىپ، سەرپىلتكەنى ءسوزسىز.
ءتۇيىپ ايتقاندا، وسى ونەر كەشىن كورە وتىرىپ، بي ونەرىنىڭ بۇگىنگى پاتشايىمى شۇعىلا دەسەك، قاتەلەسپەيتىن سەكىلدىمىز. سەبەبى، و شەتى مەن بۇ شەتى اتشاپتىرىم كونتسەرت زالىنىڭ ىشىندە ينە شانشار ورىننىڭ بولماۋى سولاي دەپ ءتۇيىن جاساتتى.
فوتو: BAQ.KZ
