ەلباسى تۇركى تىلدەس مەملەكەتتەرگە بىرلەسكەن تەلەارنا قۇرۋدى ۇسىندى
بۇنداي ۇسىنىستى ەلباسى نۇرسۇلتان نازاربايەۆ بۇگىن تۇركيالىق بودرۋم قالاسىندا تۇركى تىلدەس مەملەكەتتەردىڭ ىنتىماقتاستىق كەڭەسىنىڭ ءتورتىنشى سامميتىندە ايتتى.
«تۇركى كەڭەسىنىڭ كەلەسى باسقوسۋىنا دەيىنگى تاقىرىپقا بايلانىستى ۇسىنىس ايتقىم كەلەدى. كەلەسى جىلعى وتىرىستىڭ تاقىرىبىن تۇركى تىلدەس مەملەكەتتەردىڭ اقپاراتتىق كەڭىستىگىن دامىتۋ، بىرىككەن، باسەكەگە ساي بۇقارالىق اقپارات قۇرالدارىن دامىتۋ دۇرىس بولار دەپ سانايمىن»، - دەدى مەملەكەت باسشىسى.
ەلباسىنىڭ پايىمىنشا، سونىمەن قاتار بىزگە حالىقارالىق جەر سەرىگى ارقىلى تۇرىك، اعىلشىن جانە ورىس تىلدەرىندە حابار تاراتۋدى دامىتۋ قاجەت.
«باسەكەگە ساي ءال-جازيرا، BBC سياقتى تەلەۆيزيالىق ارنا اشساق، تۇرىك دۇنيەسىن الەمگە پاش ەتىپ، پايداسى زور بولادى»، - دەدى پرەزيدەنت.
سونداي-اق، قازاقستان پرەزيدەنتى تۇركى الەمىن ودان ارى ينتەگراتسيالاۋ تۇجىرىمداماسىن ازىرلەۋدى ۇسىندى.
ەلباسى نۇرسۇلتان نازاربايەۆ مۇنداي ۇسىنىستى تۇركيانىڭ بودرۋم قالاسىندا ءوتىپ جاتقان تۇركىتىلدەس مەملەكەتتەر ىنتىماقتاستىعى كەڭەسىنىڭ ءتورتىنشى سامميتىندە جاسادى، دەپ حابارلادى قازاقپارات ءتىلشىسى سەرىك سابەكوۆ.
«جاستارىمىزدى ۋنيۆەرسيتەتتەرىمىزدە وقىتىپ، ءبىر-بىرىنە جاقىنداتۋ كەرەك. ماقسات: تۇركى كەڭەسى، تۇركسوي-دا جۇمىس ىستەيتىن تىلدەردى، ەلدەردەگى جاعدايدى جاقسى بىلەتىن ماماندار دايارلاۋ»، - دەدى ن. نازاربايەۆ.
سونىمەن قاتار مەملەكەت باسشىسى تۇركى اكادەمياسىنا تۇركى دۇنيەسىنىڭ ينتەگراتسياسى قانداي بولاتىنىنا باعدارلاما جاساپ، تالقىلاۋعا ۇسىنۋ تۋرالى تاپسىرما بەرۋ قاجەتتىگىن باسا ايتتى.
