جاپوندىق عالىمدار قازاقستانعا اتوم ەلەكتر ستانساسىن سالۋعا كومەكتەسۋگە كەلدى

استانا. قازاقپارات - جاپوندىق عالىمدار اتوم ەلەكتر ستانساسى سالىنۋى كۇتىلىپ وتىرعان شىعىس قازاقستانعا - كۋرچاتوۆ قالاسىنا كەلدى، دەپ حابارلادى ك ت ك تەلەارناسى.

ا ە س قۇرىلىسى تۋرالى شارتقا «قاز اتوم ونەركاسىپ» جانە «رەسەي اتوم» وكىلدەرى بۇدان ءبىر اپتا بۇرىن قول قويعان بولاتىن.

كۋرچاتوۆقا كەلگەن جاپوندىق عالىمدار، ەڭ الدىمەن فۋكۋسيماداعى اتوم ەلەكتر ستانساسىنداعى جاعداي جونىندە پىكىر بولىسپەك. ەلدە 10 جىلدان كەيىن پايدا بولاتىن قازاقستاندىق ا ە س- ءتى پايدالانۋداعى تاۋەكەلدەردى بارىنشا ازايتۋ قاجەت.

ەلىمىزدە وسىنداي ستانسالاردى سالۋ ءۇشىن شىعىستاعى كۋرچاتوۆ قالاسىنىڭ ماڭى تاڭدالعان. سەمەي سىناق پوليگونىنىڭ زاردابىن جويۋعا اتسالىسقان جاپوندىق عالىمدار جيعان- تەرگەن تاجىريبەمىزبەن بولىسۋگە ءازىرمىز دەپ وتىر. جاپونيادا بۇگىندە 50 دەن استام اتوم ەلەكتر ستانساسى بار ەكەن. قازاقستان ۇكىمەتى بولسا، ەلدەگى ءوندىرىستىڭ دامۋى وسىنداي ستانسالارعا تىكەلەي تاۋەلدى ەكەنىن ايتۋدا. سوندىقتان ونىڭ قۇرىلىسىنا قارسى شىققاندارعا قاراماستان، قۋات وندىرەتىن نىسان ءبارىبىر سالىناتىن بولادى.

«MarubeniUtilitiServices»  كومپانياسىنىڭ پرەزيدەنتى تەتسۋرو يۆامي: «ءبىزدىڭ ەلىمىزدەگى فوكۋسيما ستانساسىندا جويقىن اپات بولعانى بارشاعا ءمالىم. ودان اۋىر ساباق الدىق دەسەك بولادى. وقيعا كەزىندە الىنعان تاجىريبە اتوم ەلەكتر ستانسالارىن باسقارۋدىڭ جاڭا پرينتسيپتەرى كوزدەلگەن جاڭا جاسالىمداردا ەسكەرىلەتىن بولادى. بىزدە جاسىراتىن ەشتەڭە جوق، ءبىز ىنتىماقتاستىققا جانە اشىقتىققا ءازىرمىز. جاڭا ستانسا سالاتىن كەزدە ونداعى قاتەلىكتەردى قايتالاماۋعا تىرىسامىز. قازاق ەلىنە كومەكتەسۋگە ءازىرمىز. مامان ازىرلەۋدە تاجىريبەمىز دە جەتكىلىكتى» ، - دەيدى.