الماتىعا كىرە-بەرىس جولدارعا قاتىستى ماسەلەلەر كەشەندى شەشىلۋى ءتيىس - ا. ەسىموۆ

الماتى. قازاقپارات- بۇگىن الماتى قالاسىنىڭ اكىمى احمەتجان ەسىموۆ «بىشكەك-الماتى» ماگيسترالىن قايتا جاڭعىرتۋ ماسەلەلەرى بويىنشا كوشپەلى كەڭەس وتكىزدى، دەپ حابارلادى الماتى قالاسى اكىمىنىڭ باسپا ءسوز قىزمەتىنەن.

بۇل كەڭەسكە قر وڭىرلىك دامۋ مينيسترلىگى، ق ر كولىك جانە كوممۋنيكاتسيا مينيسترلىگىنىڭ اۆتوكولىك جولدارى كوميتەتى، «قازاۆتوجول» ۇلتتىق كومپانياسى» ا ق، الماتى وبلىسى اكىمدىگى جانە قالالىق بەيىندىك قۇرىلىمدار مەن ۆەدومستۆولاردىڭ وكىلدەرى قاتىستى.

كوشپەلى كەڭەس بارىسىندا احمەتجان ەسىموۆ الماتىنىڭ باتىس جاعىنداعى قالاعا كىرە-بەرىس توراپتا ورنالاسقان ءبىرقاتار كولىك ينفراقۇرىلىمدارىن ارالادى. قالالىق جول پوليتسياسىنىڭ مالىمدەۋىنشە، بۇگىندە وسى جولدىڭ بويىندا كولىك كەپتەلىسى ءجيى ورىن الادى. بۇعان اۆتوكولىكتەردىڭ كوبەيگەندىگىمەن قاتار، بەي-بەرەكەت سالىنىپ جاتقان قۇرىلىستار دا سەبەپ بولۋدا.

ءمالىم بولعانىنداي، رەسپۋبليكالىق ماڭىزعا يە الماتى-بىشكەك تاس جولىنىڭ بويىندا قالانىڭ ەسكى شەكاراسىنان بىشكەك-استانا جول ايرىعىنا دەيىن، جول بويىندا جانارماي قۇياتىن ستانسالار، ءدامحانا، بازارلار جانە ت. ب. 70 قىزمەت كورسەتۋ نىسانى جۇمىس ىستەيدى ەكەن. ال 29 ى ءبىرقاتار زاڭ بۇزۋشىلىقتارمەن سالىنعان جانە ولار قىزىل سىزىقتىڭ بويىندا جانە جولداردى بۇرۋ جولاعىندا ورنالاسقان.

قالا اكىمىنىڭ ايتۋىنشا، الماتىنىڭ باتىس جاعىنداعى كىرە-بەرىس جولعا قاتىستى تۇيتكىلدى ماسەلەلەر كەشەندى تۇردە شەشىلمەگەن. مىسالى، ق ر كولىك جانە كوممۋنيكاتسيا مينيسترلىگىنىڭ اۆتوكولىك جولدارى كوميتەتى 2012 - جىلى الماتى اكىمدىگى مەن كولىك جانە كوممۋنيكاتسيا مينيسترلىگى اراسىندا قول قويىلعان «الماتىنىڭ كولىك-كوممۋنيكاتسيالىق كەشەنىن دامىتۋ بويىنشا جوسپارىنا» قاتىستى مىندەتتەمەلەردىڭ كوپ بولىگىن ورىنداماعان.

ال قالا اكىمدىگى نەگىزگى كولىك ماگيسترالدارىن باتىس باعىتتا قالانىڭ سىرتقى شەكاراسىنا دەيىن جەتكىزىپ وتىر. بۇل جەردە اقىن سارا، رىسقۇلوۆ جانە مومىش ۇلى داڭعىلدارىندا جول ايرىقتارى جاسالدى.

سونداي-اق، بازارلاردى جاڭعىرتۋ باعدارلاماسىنىڭ ناتيجەسىندە سولتۇستىك اينالما جولى كولىك كەپتەلىسىنەن بوساتىلدى. جاقىن ۋاقىتتا مۇندا جاڭا كولىك ءدالىزى سالىنادى. وندا ترانزيتتىك كولىكتەرگە بولەك جولاق بەلگىلەنەدى جانە اۆتوتۇراقتار مەن جۇرگىنشىلەرگە ارنالعان جول ءۇستى وتكەلدەرى سالىنادى. بوساتىلعان اۋماقتار اباتتاندىرىلادى جانە ساياباقتىق ايماقتار جاسالادى.

«مىنەكي، ەندى باتىس باعىتتا دا كولىك جانە كوممۋنيكاتسيا مينيسترلىگىمەن جانە الماتى وبلىسىنىڭ اكىمدىگىمەن بىرلەسە وتىرىپ، وسىنداي كەشەندىك تاسىلدەمەلەردى جۇزەگە اسىرۋ كەرەك»، - دەدى ءوز سوزىندە الماتى قالاسىنىڭ اكىمى.

اۆتور: جاپپاربەرگەن ايبوتا