قازاقستان جانە ازەربايجان پرەزيدەنتتەرى ەكىجاقتى ىنتىماقتاستىق ماسەلەلەرىن تالقىلادى

 استانا. قازاقپارات - مەملەكەت باسشىسى نۇرسۇلتان نازاربايەۆ ازەربايجان رەسپۋبليكاسىنىڭ پرەزيدەنتى يلحام اليەۆپەن كەزدەستى، دەپ حابارلايدى اقوردانىڭ باسپا ءسوز قىزمەتىنەن.

كەزدەسۋ بارىسىندا مەملەكەت باسشىلارى ەكىجاقتى ىنتىماقتاستىقتىڭ باسىمدىققا يە باعىتتارىن، سونداي- اق حالىقارالىق كۇن تارتىبىندەگى وزەكتى ماسەلەلەردى تالقىلادى.

اتاپ ايتقاندا، نۇرسۇلتان نازاربايەۆ پەن يلحام اليەۆ ساۋدا- ەكونوميكا، مۇناي- گاز جانە كولىك- لوگيستيكا سالالارىنداعى قارىم- قاتىناستى كۇشەيتۋ پەرسپەكتيۆالارىنا توقتالدى. بۇل رەتتە تاراپتار ەكونوميكالىق الەۋەتتى جۇزەگە اسىرۋ ماقساتىندا ءوزارا ساۋدا كولەمىن ۇلعايتۋدىڭ ماڭىزدىلىعىن اتاپ ءوتتى.

بۇدان بولەك، ەكى ەل كوشباسشىلارى حالىقارالىق جانە وڭىرلىك ۇيىمداردىڭ، تۇركىتىلدەس مەملەكەتتەر پارلامەنتتىك اسسامبلەياسىنىڭ اياسىنداعى ءوزارا ءىس- قيمىل بارىسىن قاراستىردى.