تۇركى الەمىنە تۋريستەردى كوپتەپ تارتۋ كەرەك - ن. نازاربايەۆ

استانا. قازاقپارات - تۇركىتىلدەس مەملەكەتتەردىڭ ورتاق يگىلىگىنە باستايتىن ماڭىزدى باعىت - تۋريزم. بۇل تۋرالى بۇگىن تۇركيالىق بودرۋم قالاسىندا تۇركى تىلدەس مەملەكەتتەردىڭ ىنتىماقتاستىق كەڭەسىنىڭ ءتورتىنشى سامميتىندە ەلباسى نۇرسۇلتان نازاربايەۆ ءمالىم ەتتى.

«ءبىز تۋريستەردى تۇركى الەمىنە كوبىرەك تارتۋعا ءتيىسپىز. مىسالى، بىلتىر قىتاي تۋريستەرىنىڭ سانى 100 ميلليونعا جەتكەن. ولاردىڭ قىتايدان تىسقارى ەلدەردە جۇمساعان شىعىستارى 102 ميلليارد دوللاردى قۇراعان. بۇل كورسەتكىش الداعى ونجىلدىقتا ەكى ەسەگە ارتادى دەپ بولجانىپ وتىر. وسىعان وراي ءبارىمىز بىرلەسىپ، تۋريزم سالاسىن جاڭعىرتۋىمىز كەرەك»، - دەدى مەملەكەت باسشىسى.

وسى ورايدا پرەزيدەنت تۇركى الەمىندە دە جاھان جۇرتىن تامساندىراتىن تابيعات جاۋھارلارى مەن تاريحي ورىندار جەتكىلىكتى.

«بۇل - ۇلى جىبەك جولىنىڭ سان تاراۋ جولدارى جالعاسقان ايشىقتى ءوڭىر. كۇش بىرىكتىرسەك، الەمگە ايگىلى وسى برەندتى تۇركىنىڭ يگىلىگىنە جاراتۋعا بولادى دەپ سانايمىن. ءبىزدىڭ باستامامىزبەن «تۇركى كەڭەسى - زاماناۋي جىبەك جولى» اتتى بىرلەسكەن تۋريستىك ءونىم شىعارۋ قولعا الىندى. ۇلى جىبەك جولى بويىنشا ەلەكتروندىق تۋريستىك جولنۇسقا ازىرلەۋ جۇمىستارى باستالدى. ۇلى جىبەك جولى تورتكۇل دۇنيەنى توعىستىراتىن ۇلى جاھان جولىنا اينالۋعا ءتيىس»، - دەپ ءتۇيدى ن. نازاربايەۆ.

 

اۆتور: رۋسلان عابباسوۆ