بەلگىلى عالىم قازاقستان ازاماتتارىنا ۇيلەرىندە كوك تۋدى ءىلىپ قويۋدى ۇسىندى
«ا ق ش- تىڭ تاجىريبەسىنە توقتالاتىن بولساق، ولاردا مەملەكەتتىك رامىزدەردى ناسيحاتتاۋ مەن ازاماتتاردى وتانسۇيگىشتىككە تاربيەلەۋ جۇمىستارى قىزىقتىرادى. مەنىڭ ويىمشا، جاقىن ارادا ءبىز «مەملەكەتتىك سيمۆولدار تۋرالى» زاڭعا وزگەرىستەر ەنگىزىپ، ا قش- تا سەكىلدى ءبىزدىڭ ازاماتتارعا ۇيلەرىندە ۇلتتىق بايراقتى ءىلۋ مۇمكىندىگىن بەرۋ كەرەك» ، - دەدى عالىم قازاقستان رەسپۋبليكاسىنىڭ مەملەكەتتىك رامىزدەرى كۇنىنە وراي ءوتىپ جاتقان عىلىمي- تاجىريبەلىك كونفەرەنتسيادا.
سونىمەن قاتار ول شۆەتسيانىڭ دا تاجىريبەسىن زەردەلەۋ كەرەكتىگىن جەتكىزدى. بۇل ەلدىڭ ازاماتتارى كۇن شىققان كەزدە تۋدى كوتەرۋدى داستۇرگە اينالدىرعان.
«بەلگيانىڭ دا تاجىريبەسى قىزىقتى. ماسەلەن، ولار بريۋسسەلدە ءانۇرانعا تۇتاس ءبىر ەسكەرتكىش ارناعان. مەنىڭ ويىمشا، ەكسپو-2017 قارساڭىندا بىزگە دە وسى تاجىريبەنى جۇزەگە اسىرۋ كەرەك» ، - دەدى ز. قابىلدينوۆ. جاپونيادا وقۋشىلاردىڭ ءار وقۋ كۇنى ۇلتتىق تۋدى كوتەرۋ مەن مەملەكەتتىك ءانۇراندى ورىنداۋدان باستالادى.
ونىڭ سوزىنە قاراعاندا، ەلىمىزدەگى كەيبىر وقۋ ورىندارى مەن قۇقىق قورعاۋ ورگاندارىندا بۇل تاجىريبە پايدالانىلىپ كەلەدى، الايدا ول زاڭنامالىق دەڭگەيدە بەكىتىلمەگەن.
«تۇركيادا وقۋ اپتاسى مەملەكەتتىك ءانۇراننان باستالىپ، انۇرانمەن اياقتالادى. ياعني وسى ەلدىڭ وقۋشىلارى مەكتەپ اۋلاسىندا مۋزىكالىق سۇيەمەلدەۋمەن جاپپاي ۇلتتىق ءانۇراندى ورىندايدى» ، - دەدى پروفەسسور.
وسى ورايدا عالىم اتالعان بىرنەشە مەملەكەتتىڭ تاجىريبەسىن زەردەلەپ، ونى ەلىمىزدە پايدالانۋ ماسەلەسىن قاراستىرۋ قاجەت ەكەنىن قاداپ ايتتى.
اۆتور: رۋسلان عابباسوۆ
