ءتورت شەتەلدىك سايتتىڭ قازاقستاندا قولجەتىمدىلىگىنە تىيىم سالىندى

الماتى. قازاقپارات - الماتى قالاسىنىڭ تۇركىسىب اۋداندىق سوتى 4 شەتەلدىك ينتەرنەت- رەسۋرستىڭ قازاقستاندا قولجەتىمدىلىگىنە تىيىم سالدى. بۇل تۋرالى بۇگىن الماتى قالاسى پروكۋرورىنىڭ رەسمي وكىلى گۇلنار بەردىبەكوۆا مالىمدەدى.

بۇل ارەكەتكە وسى ينتەرنەت- رەسۋرستاردىڭ الكوگولدى ونىمدەردى زاڭسىز جارنامالاۋى سەبەپ بولعان.

 ايتا كەتەيىك، بۇعان دەيىن الماتى قالاسىنىڭ تۇركىسىب اۋداندىق پروكۋراتۋراسى الكوگول ونىمدەرىن جارنامالاۋدىڭ زاڭدىلىعىن تەكسەرۋ ماقساتىندا ينتەرنەت- رەسۋرستارعا مونيتورينگ جۇرگىزگەن بولاتىن.

 باقىلاۋ جۇرگىزۋ بارىسىندا 4 شەتەلدىك بۇقارالىق اقپارات قۇرالدارىنىڭ سايتتارىندا «كيزلياركا» ، «ياگاتي» ، «مەسكال» اتتى الكوگولدى ونىمدەردىڭ جارناماسى زاڭسىز تاراتىلاتىندىعى انىقتالدى. بۇل سايتتار قازاقستاندىق ينتەرنەت پايدالانۋشىلار ءۇشىن قولجەتىمدى ەكەنى بەلگىلى.

 اتالعان ونىمدەردى جارنامالاۋ قازاقستان رەسپۋبليكاسىنىڭ «بۇقارالىق اقپارات قۇرالدارى تۋرالى» زاڭىنىڭ 14-بابى مەن قازاقستان رەسپۋبليكاسىنىڭ «جارناما تۋرالى» زاڭىنىڭ 13-بابىنىڭ تالاپتارىنا قايشى كەلىپ وتىر. سوڭعى، 13-باپتىڭ تالاپتارى بويىنشا ەتيل ءسپيرتى مەن الكوگولدى ونىمدەردى جارنامالاۋعا تىيىم سالىنعان.

«پروكۋراتۋرا وسى دەرەكتەر نەگىزىندە ينتەرنەت- رەسۋرستارعا ورنالاستىرىلعان جارنامالاردىڭ زاڭسىزدىعى جانە ولاردىڭ قازاقستان رەسپۋبليكاسىنىڭ اۋماعىنا تارالۋىنا تىيىم سالۋ تۋرالى اۋداندىق سوتقا 4 ارىز ءتۇسىردى. وسىلايشا، تۇركىسىب اۋداندىق سوتىنىڭ شەشىمى بويىنشا جوعارىدا اتالعان 4 ينتەرنەت- رەسۋرستىڭ بەتتەرىندە الكوگولدى ونىمدەردى جارنامالاۋعا تىيىم سالىندى. مۇنداي جارنامانى توقتاتپايىنشا، بۇل ينتەرنەت- رەسۋرستار قازاقستان اۋماعىندا قولجەتىمسىز بولادى» - دەدى قازاقپارات تىلشىسىنە بەرگەن تۇسىنىكتەمەسىندە الماتى قالاسى پروكۋرورىنىڭ رەسمي وكىلى گۇلنار بەردىبەكوۆا.

ەستەرىڭىزگە سالا كەتەيىك، قازاقستان رەسپۋبليكاسىنىڭ «بۇقارالىق اقپارات قۇرالدارى تۋرالى» زاڭىنىڭ 14- بابىنىڭ 3-تارماعىندا: «الكوگول ونىمدەرىن جارنامالاۋعا 2004 -جىلعى 1- قاڭتاردان باستاپ تىيىم سالىنادى» دەلىنگەن.

اتالمىش ينتەرنەت- رەسۋرستاردىڭ اتاۋلارى الداعى ۋاقىتتا بەلگىلى بولادى.

اۆتور: جاپپاربەرگەن ايبوتا