نۇرسۇلتان نازاربايەۆ پەن ابدۋللاھ گۇل قازاق-تۇرىك سەرىكتەستىگىن تالقىلادى

استانا. قازاقپارات - قازاقستان پرەزيدەنتى تۇركيا رەسپۋبليكاسىنىڭ پرەزيدەنتى ابدۋللاھ گۇلمەن كەزدەستى، دەپ حابارلادى اقوردانىڭ باسپا ءسوز قىزمەتىنەن.

كەزدەسۋ بارىسىندا مەملەكەت باسشىلارى قازاق-تۇرىك ستراتەگيالىق سەرىكتەستىگىن نىعايتۋدىڭ نەگىزگى باعىتتارىن تالقىلادى، سونداي-اق حالىقارالىق كۇن تارتىبىندەگى وزەكتى ماسەلەلەرگە توقتالدى.

نۇرسۇلتان نازاربايەۆ پەن ابدۋللاھ گۇل «جاڭا سينەرگيا» بىرلەسكەن ورتاق ەكونوميكالىق باعدارلاماسى اياسىنداعى ءبىرقاتار باعىتتار بويىنشا ءوزارا ءىس-قيمىلدى ارتتىرۋ ماسەلەلەرىن قاراستىردى.

قازاقستان پرەزيدەنتى تۇركيا ءبىزدىڭ ەلدىڭ نەگىزگى ەكونوميكالىق سەرىكتەسىنىڭ ءبىرى ەكەنىن ايتتى.

مەملەكەت باسشىسى مادەني-گۋمانيتارلىق، اسىرەسە ءبىلىم بەرۋ سالاسىنداعى قارىم-قاتىناستى ودان ءارى ورىستەتۋ جايىنا ايرىقشا كوڭىل اۋداردى. نۇرسۇلتان نازاربايەۆ ەكى ەلدىڭ وقۋ مەكەمەلەرىندە ءبىلىم الاتىن جاستار سانىنىڭ كوبەيۋى بۇل ءۇردىستىڭ قارقىن الۋىنا وڭ ىقپال ەتىپ وتىرعانىن اتاپ ءوتتى.