الماتىدا پروديۋسەردى ايەلى مەن بالالارىنىڭ كوزىنشە سوققىعا جىققان
بۇل وقيعا 1-ماۋسىم كۇنى بولدى. اندرەي، ايەلى جانە التى جاسار قىزى ەۆا مەن ءۇش جاسار يلەانانى ەرتىپ №45-اۆتوبۋسقا وتىرادى. اندرەيدىڭ ايەلى جول اقىسىن ۆاليداتور ارقىلى تولەمەك بولىپ، ەكى ادام ءۇشىن 160 تەڭگە سالعاندا ۆاليداتور ەكى بيلەت بەرمەي، ءبىر جارىم بيلەت شىعارادى.
ايالدامالاردىڭ بىرىندە اۆتوبۋس سالونىنا بيلەت تەكسەرۋشىلەر كىرىپ، اندرەيدە ەكى بيلەت بولماعاندىقتان كۇشتەپ وتباسىمەن اۆتوبۋستان شىعارىپ جىبەرگەن. اۆتوبۋستاعى باسقا جولاۋشىلار اندرەيدى جاقتاپ، جاعدايدى تۇسىندىرمەك بولعاندا بيلەت تەكسەرۋشىلەر ولاردىڭ سوزىنە قۇلاق اسپاعان كورىنەدى.
بيلەت تەكسەرۋشىلەر وزدەرىنىڭ ارەكەتتەرىن قالتافوندارىنا ۆيدەوعا تۇسىرگەن. اندرەي وسى بەينەجازباعا كەدەرگى كەلتىرمەكشى بولعاندا تەكسەرۋشىلەردىڭ ءبىرى ونىڭ جاعىنان ۇرىپ جىبەرىپتى. قاتتى سوققى العان اندرەيگە جەدەل جاردەم شاقىرىلدى، ال بيلەت تەكسەرۋشىلەردى وقيعا ورنىنا شاقىرىلعان پاترۋلدىك پوليسيا قىزمەتكەرلەرى الىپ كەتتى. كۋزمين ءوزىن جابىرلەۋشىلەردىڭ ۇستىنەن پوليتسياعا ارىز جازدى.
ال اۆتوپارك پەن اكىمشىلىكتە وسى وقيعاعا بايلانىستى ەشقانداي تۇسىنىكتەمە بەرىلمەي وتىر.
