ادەبيەت جانە ونەر سالاسىنداعى ق ر مەملەكەتتىك سىيلىعىن بەرۋ جونىندەگى كوميسسيانىڭ وتىرىسى ءوتتى
«وتاندىق مادەنيەت جان- جاقتى دامىپ كەلە جاتىر. ەلباسى بۇل سالاعا ءارقاشان قولداۋ كورسەتۋدە. ادەبيەت پەن ونەر سالاسىنداعى مەملەكەتتىك سىيلىق وسىعان دالەل.
بيىل كوميسسيا قاراۋىنا كوپتەگەن تۋىندى ءتۇستى. كونكۋرسقا قاتىسۋشىلار ەلگە تانىمال ادامدار. ءبىراق، مەملەكەتتىك سىيلىق ءۇش اتالىمدا بەرىلەدى. سوندىقتان، كوميسسيا ۇزدىك ەڭبەكتى تاڭداۋى قاجەت. تاڭداۋ بارىسىندا تاۋەلسىزدىكتى جانە ەل دامۋىن ناسيحاتتايتىن ەڭبەكتەرگە نازار اۋدارىلۋى كەرەك. بۇل - بارىمىزگە ۇلكەن جاۋاپكەرشىلىك. وتىرىستا شىعارمالاردى جان- جاقتى تالقىلاپ، ءادىل باعاسىن بەرەيىك» ، - دەدى ق ر مەملەكەتتىك حاتشىسى ادىلبەك جاقسىبەكوۆ.
وتىرىس بارىسىندا كوميسسيا مۇشەلەرىنە 2014 - جىلعى ادەبيەت پەن ونەر سالاسىنداعى ق ر مەملەكەتتىك سىيلىعىن الۋ ءۇشىن ۇسىنىلعان جۇمىستار، ولاردىڭ تىركەلۋى، قارالۋى جانە العاشقى ساراپتامادان ءوتۋى تۋرالى اقپارات بەرىلدى.
بۇدان كەيىن ەڭبەكتەردى تالقىلاۋ جانە جاسىرىن داۋىس بەرۋ پروتسەسى 3 سەكسيادا: ادەبيەت، مۋزىكا، تەاتر جانە كينو، بەينەلەۋ ونەرى جانە ساۋلەت سەكتسيالارىندا جالعاستى.
سەكسيالاردا جالعاسقان تالقىلاۋلاردىڭ، جاسىرىن داۋىس بەرۋلەردىڭ، ودان كەيىنگى جالپى وتىرىستىڭ قورىتىندىسى بويىنشا بايقاۋدىڭ كەلەسى كەزەڭىنە جىبەرىلەتىن شىعارمالار تۋرالى شەشىم قابىلدانادى.
«مەملەكەتتىك سىيلىق ادەبيەت پەن ونەر سالاسىنداعى نوۆاتورلىق ەڭبەكتەردىڭ قاتارىنا جاتقىزىلعان، قوعام تاراپىنان مويىندالعان، حالىقتىڭ مادەنيە- رۋحاني مۇراسىنا اينالعان تۋىندىلار ءۇشىن بەرىلۋى ءتيىس. مەملەكەتتىك سىيلىق جايلى شەشىم پرەزيدەنتتىڭ جارلىعىمەن بەكىتىلەتىن بولادى. سىيلىقتى پرەزيدەنتتىڭ ءوزى تابىستايتىن بولادى. بۇل لاۋرەاتتارعا دەگەن قۇرمەتتىڭ بەلگىسى» ، - دەپ اتاپ ءوتتى ءا. جاقسىبەكوۆ.
قالىپتاسقان ەرەجەگە ساي ىرىكتەۋدەن ءوتىپ، كەلەسى كەزەڭگە جولداما العان جۇمىستار ءتىزىمى قوعامدا كەڭىنەن تالقىلانۋ ءۇشىن «ەگەمەن قازاقستان» جانە «كازاحستانسكايا پراۆدا» گازەتتەرىندە جاريالاناتىن بولادى.
اۆتور: گۇلميرا عوسمانالي
