الماتىدا قىزى اناسىنا باۋىرىنىڭ جارتىسىن بەردى
№7-قالالىق اۋرۋحانانىڭ دارىگەرلەرى جاساعان ترانسپلانتولوگيالىق وتا ءساتتى ءوتتى.
بۇل تۋرالى قالالىق دەنساۋلىق ساقتاۋ باسقارماسىنىڭ باسپا ءسوز قىزمەتى حابارلادى.
«باۋىر تسيرروزىمەن اۋىراتىن ەكى ناۋقاستىڭ ەكەۋىنە دە قىزدارىنىڭ باۋىرلارىنىڭ جارتىسى سالىندى. ەكەۋىندە دە باۋىردىڭ وڭ جاعى الىنىپ، اۋىستىرىلدى. قازىر ەكى قىزدىڭ دەنساۋلىعى قاناعاتتانارلىق جاعدايدا. ال انالارى اۋرۋحانادان شىعۋعا دايىندالىپ جاتىر»، - دەلىنگەن حابارلامادا.
باۋىرىنىڭ جارتىسىن سالۋعا ارنالعان العاشقى وتا اتالعان مەديتسينالىق مەكەمەدە بىلتىر ءۇندى ماماندارىمەن بىرىگىپ جاسالعان ەدى. ول كەزدە دە اناسىنىڭ ءومىرىن قۇتقارۋعا قىزى وتا ۇستەلىنە جاتقان بولاتىن.
№ 7-قالالىق اۋرۋحانا ۇجىمى اعزا مۇشەلەرىن اۋىستىرۋ وتالارىن 2012 - جىلدان بەرى جۇزەگە اسىرىپ كەلەدى. وسى ۋاقىتقا دەيىن اۋرۋحانا قابىرعاسىندا 70 ادامعا بۇيرەك الماستىرۋ وتاسى جاسالعان.
«الماتىدا وسىنداي وتاعا 120 ادام مۇقتاج. ولاردىڭ بارلىعىن قامتۋ ءۇشىن قالالىق مەديتسينالىق مەكەمەلەردە ترانسپلانتاتسيالىق باعدارلامانى جۇزەگە اسىرۋ قولعا الىنىپ وتىر. وسىنداي مەكەمەلەردىڭ ءبىرى - №7-قالالىق اۋرۋحانا. كەز كەلگەن ناۋقاستىڭ شەتەلگە بارۋعا مۇمكىندىگى جوق. وپەراتسيادان كەيىن ناۋقاس مىندەتتى تۇردە وتا جاساعان دارىگەردىڭ باقىلاۋدا بولۋى كەرەك. قازىر اۋرۋحانادا جوسپارلى جانە گەپاتوبيليارلى حيرۋرگيا بولىمشەسى اشىلعان. بولىمشە ماماندارى الىس-جاقىن شەتەلدەردەن ءبىلىم الىپ كەلدى. وتكەن جىلدىڭ وزىندە 9 مامان - بەلارۋس ەلىندە، 5 مامان - وڭتۇستىك كورەيادا، ۇشەۋى ءۇندىستاندا ءبىلىم الىپ كەلگەن»، - دەدى قالالىق دەنساۋلىق ساقتاۋ باسقارماسىنىڭ باسشىسى جانات قاسىمجانوۆا.
ايتا كەتەرلىگى، وپەراتسياعا كەتەتىن شىعىن مەملەكەت تاراپىنان قارجىلاندىرىلدى. ال قازاقستاندا قازىر بۇيرەك اۋىستىرۋ قۇنى 2 - 2,5 ميلليون تەڭگە، باۋىر اۋىستىرۋ 8-10 ميلليون تەڭگە تۇرادى.
باۋىر جاسۋشالارىنىڭ تەز وسۋىنە بايلانىستى مۇنداي وپەراتسيا ناۋقاستىڭ دەنساۋلىعىنا قاۋىپ توندىرمەيدى. امەريكالىق مامانداردىڭ زەرتتەۋىنشە، ەكى اپتادا باۋىر تولىعىمەن ءوز قالپىنا كەلىپ، ادام اياقتان تىك تۇرىپ كەتە الادى.
اۆتور: گۇلميرا عوسمانالي
