قازاقستان سىرتقى ىستەر ءمينيسترى تۇركىتىلدەس مەملەكەتتەردىڭ ءوزارا ەكونوميكالىق بايلانىستارىن كۇشەيتۋگە شاقىرادى

بودرۋم. قازاقپارات - ق ر سىرتقى ىستەر ءمينيسترى ەرلان ىدىرىسوۆ تۇركىتىلدەس مەملەكەتتەر ىنتىماقتاستىعى كەڭەسى اياسىندا ەكونوميكالىق ءوزارا ءىس- قيمىلدى كۇشەيتۋدى ۇسىنادى. مۇنداي پىكىردى ول كەشە تۇركىتىلدەس مەملەكەتتەر سىرتقى ىستەر مينيسترلەرى كەڭەسىندە ءبىلدىردى،

 دەپ حابارلايدى بودۋرمنان قازاقپارات ءتىلشىسى سەرىك سابەكوۆ.  

«ءبىزدىڭ تۇركى كەڭەسى اياسىنداعى ىنتىماقتاستىعىمىزعا الەمدىك قوعامداستىق نازار اۋدارىپ وتىر. كەڭەس جۇمىسى باسقا دا تۇركىتىلدەس مەملەكەتتەر ءۇشىن تارتىمدى بولا ءتۇسۋى ءۇشىن بىزدەرگە ونىڭ ەكونوميكالىق قۇرامداس بولىگىن كۇشەيتۋ قاجەت» ، - دەدى ە. ىدىرىسوۆ.  

قازاقستان سىرتقى ساياسات ۆەدومستۆوسىنىڭ باسشىسى سونىمەن قاتار تۇركىتىلدەس مەملەكەتتەر ىنتىماقتاستىعى كەڭەسىنىڭ ءتورتىنشى ءسامميتىنىڭ باستى تاقىرىبى تۋريزم ەكەندىگىن دە باسا اتاپ ءوتتى.  
  «سامميت جۇمىسىنىڭ قورىتىندىسى بۇل سالاداعى ىنتىماقتاستىقتى بەلسەندى دامىتۋ ءۇشىن جاڭا مۇمكىنشىلىكتەر بەرەتىندىگىنە سەنىمدىمىن» ، - دەپ تۇيىندەدى ءسوزىن مينيستر.

«ءبىزدىڭ ىنتىماقتاستىعىمىزدىڭ باستى باعىتتارىنىڭ ءبىرى ءبىلىم بەرۋ، عىلىم جانە مادەنيەت سالالارى بولىپ تابىلادى» ، - دەدى ول.

وسىعان وراي ول تۇركى حالىقتارىنىڭ مادەنيەتىن ناسيحاتتاۋدا، مادەني- گۋمانيتارلىق سالاداعى ىنتىماقتاستىقتى نىعايتۋدا تۇركىسوي مەن تۇركى اكادەمياسىنىڭ زور ءرول اتقاراتىندىعىن باسا ايتتى.  
 
 «تۇركى اكادەمياسىن قۇرۋ تۋرالى كەلىسىم ءالى كۇنگە دەيىن تولىعىمەن راتيفيكاتسيالانعان جوق. حاتشىلىقتىڭ قارجىلىق ەرەجەسى تۋرالى كەلىسىم دە ءدال وسىنداي كۇيدە تۇر. بۇل قۇجاتتار تولىق كۇشىندە وسى جىلدىڭ سوڭىنا دەيىن ىسكە قوسىلۋى قاجەت» ، - دەپ اتاپ ءوتتى ە. ىدىرىسوۆ.

بۇگىنگى  وتىرىستىڭ باستى تاقىرىبى تۋريزم سالاسىنداعى ءوزارا ىنتىماقتاستىقتى  تەرەڭدەتۋ جايى بولماق. تۇركى كەڭەسى حاتشىلىعىنىڭ حابارلاۋىنشا، تاراپتار  «تۇركى كەڭەسى - قازىرگى زامانعى جىبەك جولى» اتاۋىمەن بىرلەسكەن جالپى تۋر پاكەتىن قابىلداۋعا ۋاعدالاسقان. ونى دايىنداۋ ءۇشىن ارنايى جۇمىس توبى قۇرىلدى.

سونىمەن قاتار، وسى سالا بويىنشا بىرلەسكەن ءبىلىم باعدارلامالارى مەن بىلىكتىلىكتى ارتتىرۋ سالاسىندا كۋرستار وتكىزۋ بويىنشا كەلىسىم جاسالدى.

ءتۇرلى باعىتتارداعى جەكەلەگەن سەكتورلاردىڭ ىنتىماقتاستىعىن ارتتىرۋ ءۇشىن تۇركىتىلدەس مەملەكەتتەر كەڭەسىنىڭ اياسىندا تۋريزمدى دامىتۋدىڭ ىسكەرلىك قاۋىمداستىعىن قۇرۋ جوسپارلانۋدا.

ەستەرىڭىزگە سالا كەتەيىك، تۇركىتىلدەس مەملەكەتتەر كەڭەسىنىڭ كەلەسى وتىرىسى 2015 - جىلى مامىر ايىندا ازەربايجاندا وتەدى.