قىتايلار قازاق ونىمىنە قىزىقتى

استانا. قازاقپارات - قىتاي حالىق رەسپۋبليكاسى شانشي پروۆينسياسىنىڭ استاناسى شيان قالاسىندا ورنالاسقان حالىقارالىق ساۋدا-لوگيستيكالىق پورتىنىڭ باسشىلىعى قازاقستان دەلەگاتسياسىمەن ەكونوميكالىق ىنتىماقتاستىق جونىندە كەلىسسوزدەر وتكىزدى.

قىتايداعى وسىناۋ اسا ءىرى قۇرعاق پورت شيان قالاسىنىڭ تەمىرجول پورتى ارقىلى قازاقستاننان جەتكىزىلەتىن ەكسپورتتىق جانە ترانزيتتىك تاسىمالداردى دامىتۋعا وتە-موتە مۇددەلى.

باتىس باعىتتاعى ىنتىماقتاستىقتى دامىتۋعا بەلسەندى قاتىسىپ جاتقان پورتتىڭ تولىققاندى جۇمىس ىستەۋى ءۇشىن، ول باتىستان شىعىسقا قاراي كەرى باعىتتاعى، سونىڭ ىشىندە قازاقستاننان قىتايعا، ودان ءارى قاراي شىعىس جانە وڭتۇستىك-شىعىس ازيا ەلدەرى مەن ازيا-تىنىق مۇحيتى وڭىرلەرىنە جونەلتىلەتىن ساۋدا اعىنىنداعى جۇكتەردىڭ جەتكىلىكتىلىگىن قامتاماسىز ەتۋى كەرەك.

حالىقارالىق ساۋدا-لوگيستيكالىق پاركىنىڭ اكىمشىلىگىندە الدەقاشان قازاقستانمەن جۇمىس جۇرگىزۋ بويىنشا باسقارما قۇرىلعان. شانشي پروۆينسياسىنىڭ ۇكىمەتى الماتىدا ءوز وكىلدىگىن دە اشىپتى.

ال Kaznex Invest ەكسپورت جانە ينۆەستيتسيالار جونىندەگى ۇلتتىق اگەنتتىگى بۇل پروۆينسيا جانە پورتپەن ەكسپورتتى جىلجىتۋ، ينۆەستيسيالىق ىنتىماقتاستىق جانە ەركىن ەكونوميكالىق ايماقتى دامىتۋ سياقتى بىردەن ءۇش باعىتتا ىنتىماقتاستىق جۇرگىزۋ جۇمىستارىن پىسىقتاپ جاتىر.

شانشي پروۆينسياسى باسشىلىعىنىڭ شاقىرۋىمەن، ءبىرقاتار قازاقستاندىق ءوندىرۋشى-ەكسپورتتاۋشىلار شيان قالاسىندا ۇيىمداستىرىلعان ۇلى جىبەك جولى بويىندا ورنالاسقان ەلدەردىڭ ينۆەستيسيالىق جاعدايى مەن ساۋدا مۇمكىندىكتەرى جونىندەگى حالىقارالىق كونفەرەنتسياعا قاتىسىپ قايتتى.

ءبىرىڭعاي ۇلتتىق ونىمدەر كورسەتىلەتىن ورىنعا «تاراز بىلعارى اياق كيىم»، «قۇلان جىلقى زاۋىتى»، «سەزامەكو»، «KUAT LTD»، «حيمپارك» ا ە ا، «قازفوسفات» ج ش س، «راحات» ج ش س سياقتى جەتى كاسىپورىن ونىمدەرىن ۇسىندى. وتاندىق كومپانيالار قىتايلىق ءىرى ساۋدا كومپانيالارىمەن كەلىسسوزدەر جۇرگىزىپ، قازاقستاندىق اگروونەركاسىپ كەشەنىنىڭ ونىمدەرىن ساتىپ الۋ ماسەلەسىن تالقىلادى.

ويتكەنى قىتايلىق ساتىپ الۋشىلار، اسىرەسە، قازاقستاننىڭ اۋىلشارۋاشىلىق ونىمدەرىنە اسا ۇلكەن قىزىعۋشىلىق تانىتتى. كەلىسسوزدەردىڭ ناتيجەسىندە قىتايلىق ءىرى كومپانيالار جىل سايىن 100 مىڭ تونناعا دەيىن قازاقستاندا وندىرىلگەن وسىمدىك مايلارىن ساتىپ الۋعا مۇددەلىلىك ءبىلدىردى. ەسەسىنە قازاقستاندىق وندىرۋشىلەرگە بىرىككەن وندىرىستەرگە قىتايلىق ينۆەستورلاردى تارتۋ مۇمكىندىگى بەرىلەدى.

بۇل - وندىرىلگەن ءونىمدى تولىق وتكىزۋ كەپىلدىگىن بەرەدى. «شيان قالاسىنىڭ حالىقارالىق ساۋدا-ەكونوميكالىق پاركى ازيا مەن ەۋروپا اراسىنداعى جۇك اعىنىن ۇزدىكسىز وڭدەۋدى قامتاماسىز ەتۋ ءۇشىن «قورعاس-شىعىس قاقپاسى» ەكونوميكالىق ايماعىنىڭ دامۋىنا مۇددەلى. پارك سونداي-اق ىنتىماقتاستىق جوبالارىن تانىستىرۋعا شانشي پروۆينسياسى مەن ەلدىڭ وزگە دە ىشكى وڭىرلەرىنىڭ مۇددەلى كاسىپورىندارىن، لوگيستيكا-كولىكتىك كومپانيالارىن بەلسەندى قاتىستىرۋ نيەتىندە. وسىلاي شانشي پروۆينسياسى مەن شيان قالاسىنىڭ قازاقستانمەن ساۋدا-ەكونوميكالىق ىقپالداستىعىن ىنتالاندىرا ءتۇسىپ، ەكى ەل اراسىنداعى بارىنشا تىعىز ساۋدا-ەكونوميكالىق ىنتىماقتاستىقتىڭ بەرىك نەگىزىن قالاماق» ، - دەيدى كەلىسسوزدەردىڭ قورىتىندىسى جايلى اڭگىمەلەگەن Kaznex Invest اتقارۋشى ديرەكتورى جالەل بولاتوۆ.

اۆتور: قۇتماعامبەت قونىسباي

«ايقىن»