الماتى ءتارتىپ ساقشىلارى ءتان ساۋداسى ورىندارىن انىقتادى

الماتى. قازاقپارات - الماتى قالاسىنىڭ ءتارتىپ ساقشىلارى وتكەن دەمالىس كۇندەرى قالاداعى ءتان ساۋداسى قىزىپ تۇرعان ورىنداردى انىقتادى. بۇل تۋرالى الماتى قالاسى ىشكى ىستەر دەپارتامەنتىنىڭ باسپا ءسوز قىزمەتىنەن حابارلادى.

 ءتارتىپ ساقشىلارى بۇل جولى، اسىرەسە، قالاداعى سەيفۋللين داڭعىلى بويىندا ورنالاسقان قوناق ۇيلەردى، ساۋنالار مەن كافە- بارلاردى تەكسەردى.

 تەكسەرۋ ناتيجەسىندە، ءبىر عانا سەنبىگە قاراعان ءتۇننىڭ وزىندە سەيفۋللين داڭعىلىنىڭ بويىنان تۇركىسىب اۋداندىق ىشكى ىستەر باسقارماسىنا 53 جەزوكشە جەتكىزىلگەن. ولاردىڭ تەك بىرەۋى عانا جەرگىلىكتى تۇرعىن بولىپ شىقتى. قالعاندارى ەلىمىزدىڭ ءار تۇكپىرىنەن كەلگەندەر. ودان باسقا، ولاردىڭ ىشىنەن وزبەكستاننىڭ ەكى ازاماتشاسى دا انىقتالدى. ولار قازاقستانعا ەلىمىزدىڭ كوشى- قون زاڭناماسىن بۇزىپ كەلگەن.

 وسى شارانىڭ بارىسى جانە ناتيجەسى تۋرالى الماتى قالاسى ىشكى ىستەر دەپارتامەنت باستىعىنىڭ ءبىرىنشى ورىنباسارى، پوليتسيا پولكوۆنيگى قانات تايمەردەنوۆ: «اتالعان مەكەمەلەردەن باسقا، ۇلكەن جولداردىڭ جيەكتەرى جانە جۇرگىنشى جولدار تەكسەرىلدى. كوپ جاعدايدا اۆتوكولىك باسقارعاندار، سول جول جيەكتەرىندە تۇراتىن جەڭىل ءجۇرىستى قىزدارمەن كەلىسۋ ءۇشىن جول ەرەجەسىن بۇزۋعا دەيىن باراتىندارى جاسىرىن ەمەس. تاعى ءبىر ايتا كەتەتىن ءجايت، قىزدارعا كەلەتىن كليەنتتەردىڭ ىشىندە كەي جاعدايدا وپەراتيۆتىك قىزىعۋشىلىق تۋعىزاتىندارى دا بولادى. ەندى وسى شارا بارىسىندا انىقتالعان ادامدار ءتيىستى ءتارتىپ بويىنشا اۋداندىق ىشكى ىستەر بولىمدەرىنە جەتكىزىلىپ، ارنايى تىركەۋ بويىنشا، ولاردىڭ قانداي دا ءبىر قىلمىستارعا قاتىسى بار- جوقتىعى تەكسەرىلەدى.

ال ۇستالعان قىزداردىڭ كوپشىلىگىنىڭ جەكە كۋالىكتەرى جوق بولىپ شىقتى. سوندىقتان، ولار وسى شارا ناتيجەسى بويىنشا ارنايى قابىلداۋشى- ءبولۋشى مەكەمەگە جونەلتىلەدى. ۇستالعان شەتەلدىك ازاماتشالار سوت شەشىمى بويىنشا ءوز ەلدەرىنە قايتارىلادى. سەيفۋللين داڭعىلى بويىندا جۇرگىزىلگەن تەكسەرۋ شاراسىنان كەيىن، جەڭىل جۇرىستەگى قىزدار مەن ولاردىڭ «جەڭگەتايلارى» باسقا جولداردىڭ ماڭايلارىنداعى قوناق ۇيلەرگە، ساۋنا، كافە جانە مەيرامحانالارعا اۋىساتىنى بەلگىلى. ءبىزدىڭ كەلەسى وپەراتيۆتىك الدىن الۋ شارامىز ەندى سول جولداردىڭ ماڭىنداعى ءتيىستى ورىندارعا باعىتتالادى» ، - دەدى.

ايتا كەتەيىك، الماتى قالاسىندا تۇراقتى نەگىزدە «ستوپ ترافيك» وپەراتيۆتىك الدىن الۋ شاراسى ءوتىپ تۇرادى. ونداعى ماقسات - ادام ساۋداسى، جەڭگەتايلىقپەن اينالىسۋ جانە ادامدى قاناۋ ماقساتىندا ۇرلاۋ سەكىلدى باعىتتاردا ورىن الىپ جاتقان قىلمىستاردى اشۋ. تەكسەرۋ شارالارى بارىسىندا پوليتسەيلەر ادەتتە ساۋنالاردى، بارلاردى جانە قالانىڭ باسقا دا كوڭىل كوتەرەتىن ورىندارىن تەكسەرەدى.

اۆتور: جاپپاربەرگەن ايبوتا