مالشىلارعا ارنالعان كوشپەلى تۇرعىن ءۇيدىڭ جوباسى جاسالدى

 استانا. قازاقپارات- ماڭعىستاۋ وبلىسىندا شارۋالارعا ارنالعان جىلجىمالى تۇرعىن ءۇي كەشەنىنىڭ جوباسى جاسالدى. زامان تالابىنا ساي كەشەن مالشىلار ءۇشىن وتە ىڭعايلى بولماق. مامانداردىڭ ايتۋىنشا، ەلىمىزدە ازىرگە مۇنداي جوبانىڭ بالاماسى جوق.

 كەشەن جاتىن ءۇي جانە مونشاسى مەن قويماسى بار قوس ۆاگوننان تۇرادى. سونىمەن قاتار سۋ ساقتايتىن بوشكە مەن مال سۋاراتىن قۇراستىرمالى استاۋلارى بار.

 كەشەن جەرگىلىكتى قۇرىلىس ماتەريالدارىنان جاسالادى. سوندىقتان دا مالشىلار ءۇشىن قولجەتىمدى باعامەن ساتىلماق. شارۋالار وزدەرىنە قاجەتتى قۋات كوزىن ۆاگون شاتىرىندا ورنالاساتىن كۇن جانە جەل ەلەكتر ستانتسيالارىنان الاتىن بولادى. ماماندار العاشقى كەشەندى سالۋعا كىرىسىپتە كەتتى.

 ابدۋللا مىرزايەۆ، «ماڭعىستاۋ سۋ جۇيەسى» م ك ك باسشىسى:

 - بۇلاردىڭ ءارقايسىسى 5 ك ۆ ت قۋات ەلەكتر ەنەرگياسىن بەرە الادى. سوندا ەكەۋىن قوسقاندا 10 ك ۆ ت بولادى. بۇل فەرمەردىڭ قۇدىقتان سۋ شىعارۋ، ءۇيىن جارىقتاندىرۋ، باسقا دا تۇرمىستىق قاجەتتىلىگىنە قاجەت ەنەرگيانى بەرە الادى. بۇل -  2017 - جىلى استانادا وتەتىن «ەكسپو -  2017» كورمەسىنە ماڭعىستاۋ وبلىسى اۋىلشارۋاشىلىعى باسقارماسىنىڭ اتىنان دايىندالىپ جاتقان ەكسپوناتىمىز.

www.24.kz