مەملەكەتتىك رامىزدەر كۇنى مەرەكەسىندە وسكەمەنگە ق ر ەلتاڭباسىنىڭ اۆتورى كەلدى

وسكەمەن. قازاقپارات - وسكەمەن جۇرتشىلىعى مەملەكەتتىك رامىزدەر كۇنىندە قالانىڭ باس كوشەسى - تاۋەلسىزدىك داڭعىلىندا ەرەكشە ءىس- شارانى مەملەكەتتىك جالاۋ ۇستاپ، شەرۋمەن قارسى الۋعا ازىرلەنۋدە.

 ءراسىم تاڭەرتەڭگى توعىز جارىمنان باستاپ بارشا جۇرت قازاقستاننىڭ مەملەكەتتىك ءانۇرانىن ورىنداپ بولعاننان كەيىن، امفيتەاتردان باستاپ ەرتىس جاعالاۋىنا دەيىنگى ارالىقتا وتەدى. قالا اكىمىنىڭ باسپا ءسوز قىزمەتىنەن حابارلاعانداي، شەرۋگە وبلىس ورتالىعىنىڭ ەڭبەك ۇجىمدارى قاتىسادى.

مەملەكەتتىك ءانۇراندى ۇجىممەن ورىنداۋعا بارلىق مەكتەپ جانىنداعى بالالار لاگەرلەرىنىڭ وقۋشىلارى دا قاتىسادى.

شەرۋدەن كەيىن سپورتشىلار بىردەن «قازاقستان» تاۋىنىڭ شىڭىنا شىعادى، وعان قالالىقتار دا قاتىسادى. بۇل ءداستۇر قالادا 5 جىل بۇرىن پايدا بولعان. جىل سايىن تاۋ شىڭىنا شىعىپ بولعاننان كەيىن، مەملەكەتتىك قىزمەتشىلەردىڭ سالتاناتتى تۇردە انت قابىلداۋ ءراسىمى وتەدى. بيىلعى جىلى مەملەكەتتىك قىزمەتشىلەردىڭ انت قابىلداۋ ءراسىمى «نۇر وتان» پارتياسىنىڭ قاتارىنا جاڭا مۇشەلەردى سالتاناتتى قابىلداۋمەن جالعاسادى.

 وسكەمەندە جوسپارلانعان شارا بۇگىن كەلگەن مەرەكەنىڭ ارنايى قوناعى قازاقستان رەسپۋبليكاسىنىڭ مەملەكەتتىك ەلتاڭباسىنىڭ اۆتورى جانداربەك مالىبەكوۆتىڭ قاتىسۋمەن وتەتىندىگىمەن ەرەكشە.

 مەرەكەلىك كۇننىڭ ەكىنشى جارتىسىندا ول مەكتەپ وقۋشىلارىمەن كەزدەسەدى، جۇزدەسۋ وقۋشىلاردىڭ شىعارماشىلىق سارايىندا وتەدى. وسكەمەندە مەملەكەتتىك رامىزدەر كۇنى مەرەكەلىك شاراسىنىڭ سوڭى جاستار كونتسەرتى، بايقاۋلار، بي كەشى جانە ءارالۋان ۇتىستار ۇيىمداستىرىلعان - كەشكى «Patriot» kz»جاستار پاتريوتتىق شاراسىنا ۇلاسادى.