اقساقال نەگە ەڭكىلدەپ جىلادى؟
نۇر-سۇلتان. قازاقپارات - 81 جاسقا كەلگەنشە ومىردەگى بال مەن ۋدىڭ تالايىنىڭ ءدامىن تاتىپ، بالا- شاعا، نەمەرە- شوبەرەسىنىڭ قىزىعىن كورىپ، «ارمانسىزبىن!» دەپ باقي دۇنيەگە وزعان اۋىل اناسىن اۋىل حالقى ماڭگىلىك مەكەنى بولعان جەر قويناۋىنا تاپسىرىپ جاتتى.
لاقاتتىڭ بەتى جابىلىپ، جينالعان قاۋىم كەزەكتەسىپ توپىراق سالا باستادى. اپامىزبەن 65 جىل وتاسىپ 84 جاسقا قاراعان شاماسىندا ارتىندا قالىپ بارا جاتقان اتامىز كەنەت بارشانىڭ نازارىن ەرىكسىز وزىنە اۋدارىپ ەڭكىلدەپ تۇرىپ جىلاي باستادى. مۇنداي كەزدە كوپ جاساپ، كوپتى كورىپ، ءومىردىڭ ىستىعى مەن سۋىعىنا ابدەن شىڭالعان اقساقالدىڭ داۋىس شىعارىپ، جاس بالاشا وكسىپ جىلاۋى ءبىرتۇرلى بولاتىنى بەلگىلى. ال كەي ادامدار «قايتسىن- اي ەندى، 65 جىل ءبىر شاڭىراق استىندا بىرگە ءومىر سۇرگەن ەكەن، ءوزىنىڭ دە تورىنەن كورى جاقىن قالعان ۋاقىتىندا كەمپىرىنىڭ ارتىندا قالۋ وڭاي دەيسىڭ بە» دەسىپ جاتتى.
ءبىراق اتامىز سابىر ساقتاۋدى قويىپ داۋىسىن قاتتى شىعارىپ، بوزداتىپ تۇرىپ سۇڭقىلداي باستاعاندا بالا- شاعالارى مەن تۇرعىلاس قارتتار دا وزدەرىن جايسىز سەزىنگەندەي كۇيگە ءتۇسىپ، قىسىلىپ- قىمتىرىلىپ «اتا، قويىڭىز ەندى، بۇنىڭىز نە، جاس بالا ەمەسسىز، جاستاي قالىپ بارا جاتقان جوقسىز، توقتاتىڭىز» دەگەن سوزدەر ەستىلە باستادى. جانىنا جاقىن تۇرعاندارى بارىپ قولتىعىنان سۇيەپ، كوز جاسىن ءسۇرتىپ الەك. ال اۋىل يمامى مەن مولدالار «اقساقال سابىر ەتىڭىز، زيرات باسىندا ايقايلاپ داۋىس شىعارىپ جىلاۋ شاريعات بويىنشا دۇرىس ەمەس» دەگەندى ايتىپ ارەڭ توقتاتتى.
ۇزاماي مارقۇم اپامىزدى جەر قويىنىنا تاپسىرۋ جۇمىسى دا اياقتالىپ مولدالار قۇران وقىپ، دۇعا باعىشتاپ، بەت سيپاپ بولىسىمەن ادامدار زيرات باسىنا ءمىنىپ كەلگەن كولىكتەرىنە وتىرىپ اۋىلعا قايتا باستادى. ەلدىڭ ەڭ سوڭىندا ءوزىنىڭ ۇرپاق- جۇراعاتىمەن عانا قالعان اتامىز قايتادان الدىڭعىسىنشا ەڭكىلدەپ جىلاپ- جىلاپ الدى دا: «مەن نەگە جىلاي بەرەدى دەپ كۇلسەڭدەر دە ۇرىسساڭدار دا وزدەرىڭ بىلىڭدەر. مەن، مەن... مارقۇم اپالارىڭدى شىن جاقسى كورەتىنمىن. الپىس بەس جىل ءبىر شاڭىراق استىندا جۇرسەك تە كوزىنىڭ تىرىسىندە «مەن سەنى جاقسى كورەمىن!» دەپ بىردە- ءبىر رەت ايتپاعانىم ويىما كەلىپ شىداي المادىم» دەدى دە ءۇيىلىپ جاتقان توپىراققا قاراپ: «قوش جانىم، تىرىڭدە ايتۋدى ەسكەرمەپپىن، مەن سەنى وتە جاقسى كورەتىنمىن، كەش مەنى، كەش!» دەپ ءۇش قايتارا ايقايلادى وكسىگەن داۋىسپەن.
امانتاي تويشىباي ۇلى
«نامىس»
