تەڭگەنىڭ تاعى قۇنسىزدانۋى مۇمكىن دەگەن ءسوز كەزەكتى جالعان اقپارات - ۇلتتىق بانك ءتوراعاسى

 استانا. قازاقپارات - تەڭگەنىڭ تاعى دا قۇنسىزدانۋى مۇمكىن دەگەن ءسوز كەزەكتى جالعان اقپارات قانا. بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ق ر ۇلتتىق بانكى ءتوراعاسى قايرات كەلىمبەتوۆ ايتتى.

«تەڭگەنىڭ تاعى دا قۇنسىزدانۋى مۇمكىن دەگەن ءسوز كەزەكتى جالعان اقپارات قانا. مۇنداي وسەك- اياڭ 2009-2014 - جىلدار ارالىعىندا جىلىنا شامامەن 13 رەت ايتىلىپ كەلەدى. سوندىقتان وسىندايمەن اينالىساتىن ارنايى الاياقتار توبى بار ەكەنىن، ولاردىڭ ماقساتى حالىق اراسىندا تۇسىنىسپەۋشىلىك تۋعىزۋ ەكەنىن ءبىلۋ كەرەك» ، - دەدى ق. كەلىمبەتوۆ.

ونىڭ ايتۋىنشا، قازىر مۇنايدىڭ باعاسى جوعارى تۇر. رۋبل دە كۇشەيىپ كەلەدى.

«دەگەنمەن رۋبل ەڭ تومەن شەگىنە دەيىن قۇنسىزدانىپ كەتسە دە، بىزگە ەشقانداي قاۋىپ تونبەيدى. مەنىڭ ويىمشا، ءبىزدىڭ تەڭگەمىزدىڭ قۇنى جەتكىلىكتى دارەجەدە قورعالعان» ، - دەدى ول.

ۇلتتىق بانك باسشىسىنىڭ ايتۋىنشا، بانكتىڭ ىشكى رەزەرۆى 28 ميلليارد دوللاردى قۇراپ وتىر. سوندىقتان ەشقانداي ديەۆالۆاتسياعا نەگىز جوق.

«ەگەر 2012 - جىلى ۇلتتىق بانكتىڭ ىشكى رەزەرۆى 28 ميلليارد دوللار بولعان بولسا، 2013 - جىلى ول 24 ميلليارد دوللارعا ءتۇسىپ قالدى. ال 2014 - جىلدىڭ 21 - مامىرىندا ول قايتادان 2012 - جىلعى دەڭگەيىنە كوتەرىلىپ، 28 ميلليارد دوللار بولدى. ياعني ەشقانداي ديەۆالۆاتسياعا نەگىز جوق» ، - دەدى باس بانكير.

 اۆتور: ءابۋ- اسقار مەكەش ۇلى