الماتىدا گەرمانيالىق مامانداردىڭ قاتىسۋىمەن بىرنەشە ناۋقاستىڭ جۇرەگىنە ەرەكشە وپەراتسيا جاسالدى
جۇرەك سوعىسىن قالىپقا كەلتىرۋگە نەگىزدەلگەن كريوابلاتسيا دەپ اتالاتىن بۇل ەمدەۋ ءادىسى بۇعان دەيىن تەك استاناداعى كارديولوگيالىق ورتالىقتا قولدانىلىپ كەلگەن بولاتىن.
دۇنيەجۇزىلىك دەنساۋلىق ساقتاۋ ۇيىمى دەرەكتەرىنە سۇيەنسەك، ادام ءولىمنىڭ 50 پايىزى جۇرەك قان تامىرلارى اۋرۋى سالدارىنان بولادى. ال، مۇنىڭ ىشىندە جۇرەكتىڭ مەزگىلسىز توقتاپ قالۋى وتە ءجيى كەزدەسەدى. دارىگەرلەردىڭ ايتۋىنشا، بۇعان كوپ جاعدايدا جۇرەك سوعىسىنىڭ بۇزىلۋى اسەر ەتەدى. كريوابلاتسيالىق وپەراتسيا وسىنداي ناۋقاستارعا قولدانىلادى. بۇل دەنەنى كەسپەي ارنايى قۇرىلعىنىڭ كومەگىمەن جاسالاتىن ءادىس.
ءسالىم بەركىنبايەۆ، كارديولوگيا جانە ىشكى اۋرۋلار ع ز ي ديرەكتورى:
- وسى ۋاقىتقا دەيىن راديوچاستوتنىي مەتود دەيدى، سول قولدانىپ كەلدى. قازىر كريوابلاتسيا قولدانىلىپ جاتىر. كريوابلاتسيا دەگەن وتە تومەن تەمپەراتۋرانى پايدالانىپ، سول جەرگە توچكانى ولتىرەدى. سونىڭ كومەگىنەن جاڭاعى پاتولوگيالىق يمپۋلس شىقپايتىن بولادى. اۋرۋلار جازىلىپ كەتەدى.
بۇعان دەيىن كريوابلاتسيالىق وپەراتسيا استاناداعى كارديولوگيالىق ورتالىقتا قولدانىلىپ كەلگەن بولاتىن. ەندى بۇل ءادىستى الماتىلىق دارىگەرلەر دە يگەرۋدە. بۇگىن كارديولوگيا جانە ىشكى اۋرۋلار ينستيتۋتى ماماندارى اتالعان وپەراتسيانى گەرمانيالىق حيرۋرگ اندرەاس مەتتسنەرمەن بىرلەسىپ جاسادى.
اندرەاس مەتتسنەر، كارديوحيرۋرگ /گەرمانيا/:
- ءبىز كەشەدەن بەرى ءتورت ادامعا كريوابلاتسيالىق وپەراتسيا جاسادىق. بۇل الەمدىك مەديتسينانىڭ سوڭعى جەتىستىگى بولىپ تابىلادى. وسىنداي ارىپتەستىكتىڭ ارقاسىندا ءبىز تاجىريبە الماسىپ، جۇرەك اۋرۋلارىنىڭ سانىن ازايتامىز دەگەن ۇمىتتەمىن.
دارىگەرلەردىڭ ايتۋىنشا، بۇگىندە رەسپۋبليكاداعى جۇرەك سوعىسىندا اقاۋى بار ناۋقاستاردىڭ سانىن ءدال ايتۋ قيىن. سەبەبى، بۇل كەنەتتەن جانە وتە ءجيى كەزدەسەتىن اۋرۋ. ەگەر كريوابلاتسيالىق ادىسپەن ونداي ناۋقاستاردى ەمدەيتىن بولسا، جۇرەكتىڭ مەزگىلسىز توقتاپ قالۋ قاۋپىن 95 پايىزعا دەيىن ازايتۋعا مۇمكىندىك بار. ايتا كەتەيىك، مۇنداي وپەراتسيا مەملەكەتتىك كۆوتامەن تەگىن جاسالادى.
