ءجۇرسىن ەرمان: قولىنان قىمىز قۇيسىن عاشىعىمىز
س. م. كيروۆ اتىنداعى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن (1976) جانە الماتى جوعارى پارتيا مەكتەبىن (1982) جۋرناليست ماماندىعى بويىنشا ۇزدىك بىتىرگەن.
1966- جىلى ەڭبەك جولىن جەزدى اۋداندىق گازەتىندە باستاعان. جەزقازعان قالالىق تەلەارناسىندا، قازاق راديوسىندا، «جۇلدىز» جۋرنالىندا، «قازاق ادەبيەتى» گازەتىندە قىزمەت اتقارعان.
قازىر رەسپۋبليكالىق كىتاپ مۋزەيىنىڭ ديرەكتورى. قازاقستانعا ەڭبەك سىڭىرگەن قايراتكەر. «قۇرمەت» وردەنىنىڭ يەگەرى، ۇلىتاۋ اۋدانىنىڭ قۇرمەتتى ازاماتى. «انا ءتىلى» حالىقارالىق قوعامىنىڭ قۇرمەتتى مۇشەسى، «ءتىل جاناشىرى» قۇرمەت بەلگىسىنىڭ يەگەرى، قازاقستان جازۋشىلار وداعىنىڭ باسقارما مۇشەسى.
«جانارتاۋ» ، «ارايلى كۇن، ارمىسىڭ» ، « ۇلىتاۋعا باردىڭ با؟ » «قۇدىرەتكە جۇگىنۋ» ، «ەكى تىزگىن، ءبىر شىلبىر» ، «قۇستىڭ كولەڭكەسى» ، «ىرعاي» ، «كوكتوبەدەگى كەزدەسۋلەر» تاعى باسقا كىتاپتاردىڭ، سونداي- اق باسپا ءسوز بەتتەرىندە جاريالانعان 100-دەن استام ماقالانىڭ، وچەركتەردىڭ اۆتورى.
شىعىس شىنارى
وسكەمەن
قالدىرىپ كەتپەسەم دە ەشتەڭەمدى
قيمايدى كوڭىل نەگە وسكەمەندى؟
بىلدىرلاپ ءتىلى شىققان بالام قۇساپ
شىقپايتىن بولىپ الدى ەستەن ەندى.
قول سوزىپ ماحابباتتىڭ جۇلدەسىنە
شومىلسام شولپىلداتىپ ۇلبەسىنە
وسكەمەن كەلىنشەك بوپ كورىنەدى
ورانعان ۇلدەسى مەن بۇلدەسىنە.
جۇلدىزداي زەرلى اسپاننان ءۇزىپ العان
تۇنگى وتتار شىعا كەلسە ءجۇزىپ الدان
كوڭىلدىڭ ايدىنىندا اعاراڭداپ
قاياۋداي قۇس جولىنىڭ ءىزى قالعان.
قياقتاي اي بوپ كوكتە تۇرسا قىلىش،
كەتەدى جۇرەك ءجىبىپ، جۇمسارىپ ءىش.
دۇبىرلەپ تۇركى اتىنىڭ تۇياقتارى،
سىبىرلەپ ويانادى ءبىر ساعىنىش.
كۇن نۇرى توزاڭداتىپ گۇلدەر شاڭىن
كوشكەندەي كوز الدىمدا گۇلدەر ساعىم.
سانامدى سىلكىلەيدى ساق كەزىمدە
سارى التىن ساۋىت كيىپ جۇرگەن شاعىم.
سايى جوق ساياسىندا گۇل وسپەگەن،
سامالى سىبىرلايدى ءبىر ەسكى ولەڭ.
كيەسىن التاي- اجەم قۇرمەت تۇتقان
بابامنىڭ بوركى شىعار بۇل وسكەمەن.
جەڭىسپەن جالعانسىن دەپ جورتۋىلدار
ەڭىستەن ەرەۋىلدەر ەركىن ۇلدار.
ىشىندە قاراعايدىڭ قاپتاپ جۇرگەن
قايداسىڭ، قاراتايلار، ءتورتۋىلدار؟
تاريحىن تەرگەسەڭدەر وسكەمەننىڭ
جۇرتى بۇل جوڭكىپ بۇلتتاي كوشكەن ەلدىڭ.
التايىم - اق بەسىگى
اتا قازاق
كىندىگىن قىلىشپەنەن كەسكەن ەردىڭ.
تاعدىرىن كەشكەن سول ۇل كورع ۇلىنىڭ،
ءتاڭىرىم، ەندى ۇزارتىپ بەر عۇمىرىن.
شىعىستىڭ شاڭىراعى جۇرگەن سىندى
شايقالىپ شۇيدەسىندە كەربۇعىنىڭ.
راحمان سۋىڭدا دا ىرىس قايناپ،
مايلايسىڭ مۇرتىڭدى ەندى، مىرىشتى ايماق.
تۇبىندە قازانىڭنىڭ تۇرسىن قاسپاق
قىر اسىپ، قيىر شەتكە جىلىسپاي باق.
ءبىر تىلسىم بار سەكىلدى شيپاڭدا دا،
كوزىمدى كىرەۋكەلەپ ۇيقى، الداما.
ەسىمدى ەسەڭگىرەپ جيىپ تۇرمىن،
تاۋىپ بەر تاريحىمدى، تيتان قالا!
ۇلىتاۋدىڭ قىمىزى
ءبىز ءۇشىن اتامىزدىڭ اسى - قىمىز،
قىمىزبەن الشى تۇسەر اسىعىمىز.
سۋسىنىن ماحابباتتىڭ قانىپ ءىش دەپ
قولىنان قىمىز قۇيسىن عاشىعىمىز.
بال ءدامى تاڭعالتادى، تولعانتادى،
تولتىرىپ توستاعاندى قولعا ال تاعى.
قىمىزبەن قوسا جۇتقىڭ كەلەدى ەكەن
قىمسىنىپ قىمىز بەرگەن سول قالقانى.
قىمىز قۇي!
قىمىز ىشسەم - باپقا كەلەم،
قىمىزدان ارتىق قازاق تاپپاعان ەم.
اتامنىڭ اسىن ىشسەم، جەلىك بۋىپ،
اۋزىمنان اقتارىلار قاپ- قاپ ولەڭ.
شولىنەن شىعىپ ەدىم ساعىنىشتىڭ،
قىمىزىن ۇلىتاۋدىڭ قانىپ ءىشتىم.
اڭقاڭدى القاعاندا اپپاق سۋسىن
باسىلار الاۋلاعان جالىنى ءىشتىڭ.
قادىرىن قايدان ءبىلسىن جوق ۇلگىنىڭ،
تورسىقتى توسىرقايدى كوپ ۇل بۇگىن.
باپتاۋلى بال قىمىزدان اڭقىپ تۇرار
ءتۇتىنىن اڭسادىم- اۋ توبىلعىنىڭ.
تەلمىرتپەي توستاعانعا، قىمىزدى بەر،
قىمىزعا قازاقتاي بوپ كىم ۇزدىگەر.
مەن ناعىز قازاقپىن با، باسقامىن با -
قىزىعىپ جۇتقانىمدا قىمىز بىلەر.
بولسىن دەپ ءۇيىر- ءۇيىر جىلقىم امان
كوڭىلىم قامبار اتا جۇرتىنا الاڭ.
بالشىقتاي ۇلدارىمدى باۋلي بەرسىن
جارىقتىق جۋسان ءيسى بۇرقىراعان.
شەشەمنىڭ شەلەك شايىپ، ءىس قىلعانى،
تەرى مەس، جەز ساماۋىر، مىس قۇمعانى
كەلەدى كوز الدىما كينو بولىپ
تاتىسا تاڭدايىما ىستىڭ ءدامى.
قاپىسىز قادىرلەسەڭ قوناعىڭدى،
قاراعىم، قىلتىڭداتپا اراعىڭدى.
سارقىپ قۇي ساباداعى سۋسىنىڭدى،
ءجىبىتسىن جىبىرلاعان تاماعىمدى!
دايىنداعان: اكەجان داكەن
http://massaget.kz/
