شىعىس قازاقستان وبلىسى مەن قىتاي ەلىنىڭ اراسىندا تەمىرجول سالىنباق

 استانا. قازاقپارات - شىعىس قازاقستان وبلىسى مەن كورشى قىتاي ەلىنىڭ تارباعاتاي ايماعى تىعىز ەكونوميكالىق قارىم- قاتىناس ورناتقان. قازىر قىتايدىڭ قاراماي قالاسى مەن شاۋەشەككە دەيىنگى ارالىعىندا تەمىرجول قۇرىلىسى باستالدى.

ودان سوڭ شاۋەشەكتەن اياگوزگە دەيىن جول تارتۋ جوسپارلانىپ وتىر. بۇل قىتاي تاراپىنا قازاقستان ارقىلى ەۋروپاعا شىعۋعا مۇمكىندىك بەرسە، ەلىمىز ءۇشىن قىتايعا جۇك تاسىمالداۋدى دامىتۋعا ىقپال ەتەدى، دەپ حابارلايدى 24.kz.

«بيىل ساۋىردىڭ  11 - كۇنى قاراماي قالاسىنان شاۋەشەككە تەمىرجول قۇرىلىسى باستالدى. ول 2016 - جىلى اياقتالادى دەپ جوسپارلاپ وتىرمىز. ودان كەيىن ەكى مەملەكەت تولىقتاي ورتاق كەلىسىمگە كەلىپ جاتسا، اياگوز قالاسىنا تەمىرجول تارتۋ جۇمىسى باستالادى» ، - دەدى ق ح ر شىڭجاڭ- ۇيعىر اۆتونوميالىق ولكەسىنىڭ تارباعاتاي وكرۋگى پارتيا كوميتەتىنىڭ حاتشىسى حۋ بىنجى.

 سونداي- اق اياگوز اۋدانى اۋماعىندا 18 گەكتار جەرگە كولىك- لوگيستيكالىق تەرمينال سالۋ جوسپارلانىپ وتىر. بۇل تەك قىتاي ەلىمەن ەمەس، سونىمەن قاتار كورشى رەسەيمەن دە ەكونوميكالىق بايلانىستى نىعايتۋعا مۇمكىندىك بەرمەك.

«اياگوز قالاسىندا تەمىرجول سالاسىندا 12 كاسىپورىن جۇمىس ىستەيدى. ءبىزدىڭ تۇركسىب تەمىرجولى بۇگىنگى كۇندە 60 پايىزعا عانا جۇكتەلىپ تۇر. مىنا جوسپارلانعان جوبالار ىسكە اسىرىلىپ، جۇك تاسىمالداۋ ينفراقۇرىلىمىن ءارى قاراي دامىتساق، وسى كولىك كومپانيالارىنىڭ جۇمىسى تولىق قامتاماسىز ەتىلمەك. سول كاسىپورىندار ەكونوميكانىڭ دامۋىنا ءوز ۇلەسىن قوسادى دەگەن ۇلكەن جوسپارىمىز بار» ، - دەيدى اياگوز اۋدانىنىڭ اكىمى نۇربول نۇرعاليەۆ.