قازاقستاندىق ونەرپازدار بالالارىنا قانداي ەسىمدەر قويادى؟
1- ماۋسىم - بالالاردى قورعاۋ كۇنى قارساڭىندا ءبىز جاقىندا اتا- انا اتانعان قازاقستاندىق ونەرپازدار بالالارىنا قانداي ەسىمدەر بەرگەنىن انىقتاپ كوردىك.
2013 - جىلى 14 - جىلدىق ۇزىلىستەن كەيىن ەكىنشى رەت اكە اتانعان ساكەن مايعازيەۆ قىزىنا رايانا دەگەن ەسىم قويدى. رايان - «جۇماققا كىرەتىن قاقپا» دەگەن ماعىنا بەرەدى. رايانا ەسىمىن ساكەن مايعازيەۆتىڭ اناسى دا قولداپ، وسىلاي اتاۋدى ءجون كورىپتى.
سونىمەن قاتار، 2012 - جىلى ءتورتىنشى رەت انا اتانعان ينديرا راسىلحان دا ءدىني تۇرعىدا ماعىناسى تەرەڭ رايانا ەسىمىن قىزىنا قويعان ەكەن.
تۇڭعىشىن ا ق ش- تا بوسانىپ، اعىلشىن تىلىنە بەيىمدەپ، قىزىن ريانا دەپ اتاعانىمەن، ءانشى ليدو Rihana ەسىمىن قازاقشالاپ رايحان دەپ تە اتاۋعا بولاتىنىن جەتكىزدى. ال 2012 - جىلى تۋىلعان ەكىنشى ۇلىنا ارابشادان اۋدارعاندا «راقىمشىل» دەگەن ماعىنا بەرەتىن راحمان ەسىمىن تاڭداعان ەكەن.
«جىگىتتەر» توبىنىڭ ءانشىسى باعلان ءابدىرايىموۆ تۇڭعىش قىزىنىڭ ەسىمىن ايقاراكوز دەپ ءوزى قويعان. بۇل ەسىمنىڭ «جىگىتتەر» توبىنىڭ ورىنداۋىنداعى «ايقاراكوز» انىمەن بايلانىسى دا بار ەكەن. مۇنى ءانشى ءوزى بىلاي تۇسىندىرەدى: «ەرتەڭ قىزىم ءوسىپ، بوي جەتكەن كەزدە: «اتىڭ نەگە ايقاراكوز؟ » دەپ سۇراعاندارعا: «اكەم ايقاراكوز دەگەن ءاندى ورىنداعان» دەپ ايتىپ جۇرەدى. ال، ول ۋاقىتقا دەيىن بۇل ءان ەسكىرگەننەن كەيىن، بۇل ءاندى مىندەتتى تۇردە تىڭدايدى. اينالاسىنداعىلارعا تىڭداتادى، ماقتان تۇتادى.. .»
ايقىن تولەپبەرگەن تۇڭعىشىنا اڭسار دەگەن ناعىز قازاقى ەسىمدى بەرگەن ەكەن. قازاقتار كوبىنە ساعىنا، زارىعا كۇتكەن بالاسىنا اڭسار دەگەن ەسىم بەرىپ جاتادى.
ءانشى، اكتريسا، «ارناۋ» دۋەتىنىڭ مۇشەسى سالتانات باقايەۆا تۇڭعىش ۇلى دۇنيەگە كەلگەندە ءبىر اپتاداي ەسىم تاڭداي الماپتى. كوپتەگەن ۇسىنىلعان ەسىمدەردىڭ ىشىنەن لايىقتى ەسىمىنەن قايسىن تاڭدارىن بىلمەي، كوپ ويلانىپتى. سوڭىندا ءسابيدىڭ اتاسى ءامىر دەپ قويعان ەكەن. ءامىر - اراب تىلىنەن اۋدارعاندا - «حانزادا» دەگەن ماعىنانى بەرەدى.
قاراقات ءابىلدينانىڭ ءتورتىنشى بالاسىن دۇنيەگە اكەلگەنىنە كوپ بولا قويعان جوق. بەكبولات، نۇرالى، يمانالى دەگەن ۇلدارىنان كەيىن ءانشى ايسۇلتان ەسىمدى باتىردى دۇنيەگە اكەلدى. كەنجەلەرىنىڭ ەسىمىن ءۇش اعاسىنىڭ تاڭداۋىمەن قويعان ەكەن.
ءانشى بەيبىت قورعان ءبىر ۇل، ءبىر قىزدى تاربيەلەپ وتىر. تۇڭعىش ۇلى بەكسۇلتاننىڭ ەسىمىن ءانشىنىڭ اكەسى قويعان. ال قىزىن بالداي ءتاتتى، قىلىقتى ءارى زيالى بولسىن دەپ بالزيا اتاپتى. سونىمەن قاتار وتباسىندا ءبارىنىڭ ەسىمدەرى «ب» ارپىنەن باستالاتىندىقتان وسى ءداستۇردى بۇزباعاندى ءجون كورگەن.
ءۇش قىزدان كەيىن دۇنيەگە كەلگەن ۇلىن تۇرسىنبەك قاباتوۆ نۇريمان دەگەن ەرەكشە ەسىممەن اتاعان ەكەن. جالپى سوڭعى كەزدەرى سابيلەرگە «نۇر» ، «يمان» ، «يسلام» سوزدەرىن قامتىعان ەسىمدەر ءجيى قويىلىپ جۇرگەنىن بايقاۋعا بولادى.
بىلتىر انا اتانعان اكتريسا قارلىعاش مۇحامەدجانوۆا تۇڭعىش قىزىنا اجار دەگەن قاراپايىم ەسىمدى بەرىپتى. قاراپايىم بولعانىمەن، «اجارلى، كورىكتى، كەلبەتتى» دەگەن ادەمى ماعىنا بەرەتىن ەسىمنىڭ يەگەرى دە اناسى سياقتى كورىكتى قىز بولادى دەپ سەنەمىز.
تاۋاسار، ايزەرە، حانتورە سىندى ەرەكشە ەسىمدەرگە اكتەر بەرىك ايتجانوۆتىڭ بالالارى يە. كەنجە بالاسىنىڭ اتىن اكتەر اكەسى تورەحاننىڭ ەسىمىن تۇرلەندىرىپ قويعان ەكەن.
ال جاقىندا عانا ەكىنشى رەت انا اتانعان دينارا ساتجان قىزىن دايانا دەپ اتاعان. تۇڭعىش ۇلىنىڭ ەسىمى - دانيال. بۇل ەسىم اراب تىلىنەن «قۇدايدىڭ سىيى» دەپ اۋدارىلادى ەكەن.
سوڭعى كەزدەرى سابيلەرگە قويىلىپ جۇرگەن ەسىمدەر جايلى اڭگىمەلەسە وتىرايىق.. .
سۋرەت: kinomuz.ucoz.net, spletnik.ru, instagram.com
دايىنداعان: انار مۇستافينا
