بامبۋكتەن جاسالعان ءۇي

الماتى. قازاقپارات - جاقىندا قىتايدا ءبىر ازامات كوشىپ-قونىپ جۇرۋگە ىڭعايلى ءۇي جاساپ الدى.

ءبىر تاڭدانارلىعى، ونىڭ كوشپەلى ۇيىنە كۇندەلىكتى تىرلىككە قاجەتتى زاتتار مەن بۇيىمداردىڭ ءبارى وپ-وڭاي سىيىپ كەتەدى ەكەن.

كوشپەلى تۇرعىن ءۇيدىڭ اۆتورى - ليۋ لينچاو. ول بوساعان بوتەلكەلەردى ساتۋمەن اينالىسادى ەكەن. ۇزاق جىلدان بەرى ءۇي-كۇيسىز، رەتى كەلگەن جەردە كۇنەلتىپ كەلگەن ليۋ لينچاو بۇدان بىلاي كورىنگەننىڭ ەسىگىندە جۇرمەي، ءوزى سىياتىن شاعىن ءارى كوشپەلى ءۇي جاساۋعا كىرىسەدى.

ءسويتىپ، ول كادۋىلگى بامبۋك اعاشىنان شاعىن ءۇي جاساۋ قاجەت دەپ شەشەدى.

- سەبەبى، بامبۋك اعاشتاردىڭ ىشىندەگى ەڭ جەڭىلى ءارى ەشقانداي جاعىمسىز ءيسى جوق. دەنساۋلىققا ەش زيانى دا جوق. بۇعان قوسا، جاس بامبۋك وتە يىلگىش كەلەدى. دەمەك، قالاعان كولەمدە جينالمالى ءۇي جاساۋعا وتە قولايلى. مەن وسىنداي قاسيەتتەرى ءۇشىن بامبۋكتى تاڭداپ الدىم. ەڭ باستىسى، جاڭا ءۇيىم كوشىپ-قونىپ جۇرۋگە ىڭعايلى، - دەدى ليۋ لينچاو جەرگىلىكتى جۋرناليستەرگە بەرگەن سۇحباتىندا.

ءبىر ەرەكشەلىگى، قىتاي ازاماتى جاساعان شاعىن ءۇيدىڭ سالماعى نەبارى - 60 كەلى. ونى جاساۋ ءۇشىن ءبىراز كولەمدە بامبۋك اعاشى جانە كادۋىلگى پوليەتيلەن پلەنكاسى پايدالانىلعان. تاعى ءبىر ارتىقشىلىعى، ليۋ لينچاو ءۇيدىڭ ىشىنەن ارنايى سورە جاساپ، وعان ءوزىنىڭ كۇندەلىكتى ومىردە قاجەتتى اياق-تاباعى مەن كيىم-كەشەكتەرىن جانە توسەك-ورنىن جيناپ قويادى ەكەن.

شاعىن ءۇيدىڭ قۇندىلىعى سوندا، ءۇي يەسى بۇدان بىلاي پاتەراقى تولەپ، شىعىن شىعارمايدى. تاپقان ءناپاقاسى ۇنەمى قالتاسىندا قالادى. سونىمەن قاتار، كۇندەلىكتى بوساعان بوتەلكەلەردى جيناپ-ساتىپ كۇنەلتىپ جۇرگەن جاس جىگىت قاجەت كەزدە شاعىن ءۇيىن وزىمەن بىرگە كوتەرىپ، الىپ جۇرەدى. قايدا بارسا دا ءۇيى دايىن. بۇعان قوسا، قاجەت كەزدە پەشتى جاعىپ جىبەرىپ، قالاعان تاماعىن دا ءاپ-ساتتە پىسىرۋگە مۇمكىندىك بار.

ءومىر سۇرۋگە قولايلى شاعىن ءۇي تۇرعىزۋ قازىرگى كۇنى قىتايدا باستى دا وتە ماڭىزدى ماسەلەگە اينالىپ وتىر. سەبەبى، ميللاردتار ەلىندە ءۇيسىز-كۇيسىز، باسپاناسىز جۇرگەن قاراپايىم جاندار وتە كوپ. سوندىقتان قولىنان ءىس كەلەتىن تۇرعىندار وزدەرى ءۇشىن قاجەتتى ءۇيدى تابىلعان قۇرىلىس ماتەريالدارىنان ءوز قالاۋىنشا سالىپ الۋعا بەيىم.

ايتا كەتەتىن ءبىر جايت، قازىرگى كۇنى ەل ۇكىمەتىنىڭ شەشىمىمەن قىتايداعى ىرگەلى كومپانيالار تۇرعىندار ءۇشىن وتە قولايلى ءارى ىڭعايلى، قۇنى ارزان شاعىن ۇيلەر سالۋدى قولعا الا باستادى. بۇعان دالەل - سوڭعى ۋاقىتتا قىتايدا كادۋىلگى پروپيلەننەن جاسالعان ىقشام ۇيلەر جاپپاي ساتىلىمعا شىعارىلا باستادى. گارموشكا ۇلگىسىندە جاسالعان مۇنداي ءۇيدىڭ وزىنە ءتان ارتىقشىلىعى - قاجەت كەزدە اقىرىن جايساڭىز، ءۇيىڭىز دايىن. ءتىپتى جاز ايلارىندا مۇنداي ىقشام ۇيلەردى اشىق اسپان استىندا اسحانا ۇستەلى نەمەسە جۋىناتىن بولمە، ت. ب. قاجەتتىلىكتەر ءۇشىن پايدالانۋعا دا بولادى. ەڭ باستىسى، مۇنداي ىقشام ۇيلەر اسىرەسە اۋىلشارۋاشىلىعى جۇمىسشىلارى ءۇشىن وتە قولايلى ەكەن.

مولداحمەت ۇلى جومارت

«ايقىن»