الەكساندر لۋكاشەنكو پوستكەڭەستىك ەلدەردى ت م د- دان شىعۋعا اسىقپاۋعا شاقىردى

مينسك. قازاقپارات - بەلارۋس پرەزيدەنتى الەكساندر لۋكاشەنكو پوستكەڭەستىك ەلدەردى ت م د قۇرامىنان شىعۋعا اسىقپاۋعا شاقىردى.

بۇل تۋرالى ت م د ۇكىمەتتەرى كەڭەسىنىڭ وتىرىسىنا كەلگەن پرەمەر- مينيسترلەر مەن ولاردىڭ ورىنباسارلارىمەن وتكەن كەزدەسۋدە ايتىلدى.

«مەن وسىعان قاتىستى جەكەلەگەن مالىمدەمەلەردەن كەيىن ۋكراينا پرەزيدەنتىنىڭ مىندەتىن اتقارۋشىمەن جانە ءبىزدىڭ ۋكرايندىق ەلشىمەن سويلەستىم. نە نارسەنى دە اسىقپاي، بايىپپەن شەشكەنىمىز ءجون. اعاتتىقا، اسىعىستىققا جول بەرمەيىك، ورالۋ ودان دا قيىن بولادى. سوندىقتان دا ءوزارا ءىس- قيمىلدىڭ ورنىقتى الاڭىنا اينالعان وسى ۇيىمنان شىعۋعا اسىقپاۋدى شاقىرامىن» ، - دەدى ول.

ونىڭ ايتۋىنشا، ت م د قازىر اۋىر كەزەڭدى باسىنان وتكەرۋدە. «جاڭا قىسىم وشاقتارى، ەسكالاتسيا جانە پوستكەڭەستىك كەڭىستىكتەگى زورلىق- زومبىلىق جايلى جاڭالىقتاردى ءجيى ەستىپ جاتامىز. ت م د- دان پايدا جوق دەگەن «جاناشىرلاردىڭ» پىكىرى دە ءجيى ايتىلادى. ءبىراق بەلارۋس ەلى ت م د- نى ماڭىزدى، اسا قاجەت، وزەكتى بىرلەستىك دەپ قابىلدايدى، ول قاتىسۋشىلارىنا كوكەيتەستى ماسەلەلەردى ءتيىمدى شەشۋگە مۇمكىندىك بەرەدى، - دەپ قوستى ول.
  ەسكە سالا كەتەيىك، ت م د قۇرامىنان 2010 - جىلدىڭ باسىندا گرۋزيا شىقتى. ناۋرىزدا ۋكراينانىڭ ۇلتتىق قاۋىپسىزدىك جانە قورعانىس كەڭەسىنىڭ حاتشىسى اندرەي پارۋبيي ۋكراينا ت م د قۇرامىنان شىعۋعا دايىندىق ۇستىندە ەكەندىگىن مالىمدەدى.

***

 تاۋەلسىز مەملەكەتتەر دوستاستىعى (ت م د) - ىدىراعان ك س ر و ورنىنا 1991 ج. 21 -جەلتوقساندا قۇرىلعان حالىقارالىق ۇيىم.

1991 ج. جەلتوقساننىڭ 8- ىندە مينسكىدە (بەلوۆەج) رەسەي، بەلارۋس جانە ۋكراينا باسشىلارى كەزدەسىپ، 1922 ج. ك س ر و قۇرىلۋى تۋرالى كەلىسىمى ىستەن جويىلعاندىعى جانە ت م د قۇرىلعاندىعى تۋرالى كەلىسىمگە قول قويدى. 1991 ج. جەلتوقسانننىڭ 13 ىندە ورتا ازيا مەن قازاقستان باسشىلارى اشعاباتتا كەزدەسىپ، «بەلوۆەج كەلىسىمىن» قولدايتىندىقتارىن مالىمدەدى. 1991 ج. جەلتوقسانننىڭ 20 ىندا ءازىربايجان، ارمەنيا، بەلارۋس، قازاقستان، قىرعىزستان، مولدوۆا، رەسەي، تاجىكستان، تۇرىكمەنستان، وزبەكستان باسشىلارى الماتىدا 21 - جەلتوقساندا ت م د- نى قۇرۋ تۋرالى كەلىسىم حاتتاماسىنا قول قويدى.

كەزدەسۋگە قاتىسۋشىلار ىشكى جانە سىرتقى ساياساتتىڭ ءارتۇرلى سالالارىندا ىنتىماقتاستىققا بەيىلدىلىگىن راستايتىن، بۇرىنعى ك س ر وداعىنىڭ حالىقارالىق مىندەتتەمەلەرىن ورىنداۋعا كەپىلدىك جاريالايتىن الماتى دەكلاراتسياسىن قابىلدادى. 1993 -جىلعى جەلتوقساندا دوستاستىققا گرۋزيا قوسىلدى، ال 2009 -جىلعى 18 -تامىزدا اتالعان بىرلەستىكتەن شىقتى. تۇرىكمەنستان ت م د- نىڭ قاۋىمداستىرىلعان مۇشەسى بولىپ تابىلادى.

 تاۋەلسىز مەملەكەتتەر دوستاستىعى مەملەكەت بولىپ تابىلمايدى جانە ۇلت ۇستىلىك وكىلەتتىككە يە ەمەس. ول ءوزىنىڭ بارلىق مۇشەلەرىنىڭ ەگەمەندى تەڭدىگىنە نەگىزدەلگەن جانە 1993 -جىلعى 22 - قاڭتارداعى جارلىعى بويىنشا ءىس- ارەكەت جاسايدى. دوستاستىقتىڭ مۇشە مەملەكەتتەرى حالىقارالىق قۇقىقتىڭ دەربەس جانە تەڭ قۇقىقتى سۋبەكتىلەرى بولىپ تابىلادى.