عالىم ب. جۇبانوۆتىڭ جارقىن بەينەسى حالقىمىزدىڭ جادىندا ءاردايىم ساقتالادى - ن. نازاربايەۆ

استانا. قازاقپارات - مەملەكەت باسشىسى نۇرسۇرلتان نازاربايەۆ ۇلتتىق عىلىم اكادەمياسىنىڭ اكادەميگى، كورنەكتى عالىم بولات جۇبانوۆتىڭ قايتىس بولۋىنا بايلانىستى ونىڭ وتباسى مەن تۋىستارىنا كوڭىل ايتۋ جەدەلحاتىن جولدادى.

بۇل تۋرالى اقوردانىڭ باسپا ءسوز قىزمەتىنەن حابارلادى.

نۇرسۇلتان نازاربايەۆ بولات جۇبانوۆتىڭ ءومىرى ابىرويلى ەڭبەكتىڭ ۇلگىسى ەكەنىن اتاپ كورسەتتى.

 مەملەكەت باسشىسى اكادەميكتىڭ ەلىمىزدەگى حيميا عىلىمىنىڭ وزەكتى سالالارىنىڭ دامۋىنا ولشەۋسىز ۇلەس قوسقانىن اتاپ وتكەن. ول حيميا عىلىمدارى ينستيتۋتىنا ۇزاق جىلدار بويى جەمىستى باسشىلىق ەتتى. لايىقتى ءىزباسارلار تاربيەلەدى. سونىمەن قاتار، ىرگەلى زەرتتەۋلەرى ءۇشىن مەملەكەتتىك سىيلىققا جانە وزگە دە ماراپاتتارعا يە بولدى. قازاقستان پرەزيدەنتى عالىمنىڭ ادامگەرشىلىك قاسيەتتەرى مەن يگىلىكتى ىستەرى ارقىلى وتانداستارىمىزدىڭ ەسىندە قالاتىنىن ايتتى.

«ابزال ازامات، عيبراتى مول عالىم بولات جۇبانوۆتىڭ جارقىن بەينەسى حالقىمىزدىڭ جادىندا ءاردايىم ساقتالادى» ، - دەلىنگەن جەدەلحاتتا.

جۇبانوۆ بولات احمەت ۇلى (4.2.1929 -جىلى تۋىلعان، اقتوبە وبلىسى، تەمىر اۋدانى) - عالىم، حيميا عىلىم دوكتورى (1968) ، پروفەسسور (1969) ، قازاقستان عىلىم اكادەمياسىنىڭ اكادەميك (1975) ، قازاقستاننىڭ ەڭبەك سىڭىرگەن عىلىم قايراتكەرى (1979) . ماسكەۋ حيميا- تەحنولوگيا ينستيتۋتىن (1952) جانە ونىڭ اسپيرانتۋراسىن (1955) بىتىرگەن.

 1955 - 56 -جىلدارىن ك س ر و عىلىم اكادەمياسىنىڭ ەلەمەنتورگانيكالىق قوسىلىستار ينستيتۋتىنىڭ كىشى عىلىم قىزمەتكەرى، 1956 - 68 -جىلدارى قازاقستان عىلىم اكادەمياسىنىڭ حيميا عىلىمدارى ينستيتۋتىنىڭ كىشى، اعا عىلىم قىزمەتكەرى، ديرەكتورى (1968 - 88) ، 1972 - 94 -جىلى قازاقستان عىلىم اكادەمياسىنىڭنىڭ حيميا- تەحنولوگيا عىلىمدارى بولىمشەسىنىڭ اكادەميك- حاتشىسى، 1963 - 69 -جىلدارى قاز م ۋ- دىڭ جوعارى مولەكۋلالىق قوسىلىستار حيمياسى كافەدراسىنىڭ ۇيىمداستىرۋشىسى جانە مەڭگەرۋشىسى ءارى پروفەسسورى بولدى.

 1969 -جىلدان قازاقستان عىلىم اكادەمياسىنىڭ حيميا عىلىمدارى ينستيتۋتىنىڭ پوليمەرلەر سينتەزدەۋ لاباراتورياسىنىڭ مەڭگەرۋشىسى. نەگىزگى عىلىمي ەڭبەكتەرى ماكرومولەكۋلا ءتۇزىلۋ پروتسەسىن زەرتتەۋگە، جاڭا مونومەرلەردى، جىلۋعا جانە وتقا ءتوزىمدى، مەديتسينادا قولدانىلاتىن پوليمەرلەردى، كومپوزيتسيالىق ماتەريالداردى الۋعا ارنالعان. پوليكوندەنساتسيالىق پروتسەستەردىڭ تەورياسى مەن پراكتيكاسىن دامىتۋعا ۇلكەن ۇلەس قوستى.

«اسسوتسياتيۆتى پوليكوندەنساتسيا» دەپ اتالاتىن پوليمەر ءتۇزىلۋدىڭ جاڭا پروتسەسىنىڭ نەگىزگى پرينتسيپتەرىن جاسادى. بۇل پرينتسيپتەر كوپفۋنكتسيونالدى مونومەرلەردى قولدانۋ ارقىلى پوليمەرلەردى سينتەزدەۋدىڭ جاڭا ءادىسىن جاساۋعا مۇمكىندىك تۋعىزدى. جۇبانوۆ پوليمەرلەر الۋعا مۇمكىندىك بەرەتىن پوليكوندەنساتسيالىق پروتسەستەر كاتاليزىنىڭ عىلىمي نەگىزدەرىن جاسادى. جاڭا دارىلىك پرەپاراتتار - انالگەتيكتەر، انەستەتيكتەر، تۋبەركۋلەز بەن قاتەرلى ىسىككە قارسى جانە كارديوتروپتى زاتتار الدى. قازاقستان مەملەكەتتىك سىيلىق لاۋرەاتى (1984) .