ساياسي قۋعىن-سۇرگىن جانە اشارشىلىق قۇرباندارى ءارقاشان ءبىزدىڭ جادىمىزدا - ەلباسى

استانا. قازاقپارات - مەملەكەت باسشىسى ن. نازاربايەۆ ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە ارنالعان شارالارعا قاتىسۋشىلارعا ۇندەۋ جولدادى.

ۇندەۋ ءماتىنى «ەگەمەن قازاقستان» گازەتىندە جاريالاندى.
«قازاقستاندا 31 - مامىردا مەنىڭ 1997 - جىلعى جارلىعىممەن بەكىتىلگەن ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى اتالىپ كەلە جاتقانىنا 17  جىل بولدى.

ءبىزدىڭ بارشا حالقىمىز ءۇشىن بۇل كۇن ەرەكشە تاريحي مانگە يە.

ⅩⅩ عاسىردىڭ 30-40-جىلدارىنداعى جاپپاي ساياسي قۋعىن-سۇرگىن ميلليونداعان ادامعا قايعى-قاسىرەت اكەلدى.

قازاق حالقىنىڭ كورنەكتى پەرزەنتتەرى - شاكارىم قۇدايبەرديەۆ، احمەت بايتۇرسىنوۆ، ساكەن سەيفۋللين، ماعجان جۇمابايەۆ، بەيىمبەت مايلين جانە باسقا دا كوپتەگەن ساڭلاقتارىمىز قۋعىن-سۇرگىن قۇرباندارى بولدى.

قاتال توتاليتارلىق جۇيەنىڭ بارلىق اۋىرتپالىعىن قازاق حالقىمەن بىرگە جەر اۋدارىلعان 1,5 ميلليون نەمىس، پولياك، كورەي، چەشەن، تۇرىك، گرەك جانە باسقا دا حالىقتار وكىلدەرى كوتەردى. زۇلمات زامانعا قاراماستان، بارىنان ايىرىلعان جاندار ءبىزدىڭ جەرىمىزدەن جاڭا باسپانا تاۋىپ، جان جىلۋىنا، تۇسىنىستىك پەن قامقورلىققا يە بولدى.

بۇگىنگى ءىس-شارالاردىڭ قوعامدىق كەلىسىمنىڭ ايرىقشا ينستيتۋتى بولىپ تابىلاتىن قازاقستان حالقى اسسامبلەياسىنىڭ اياسىندا ءوتىپ جاتۋىنىڭ تەرەڭ ءمانى بار.

تاتۋلىق، بىرلىك جانە تۇراقتىلىق - بۇل قازاقستاننىڭ  XXIعاسىرداعى دامۋىنىڭ ماڭىزدى پرينتسيپتەرى جانە «2050» ستراتەگياسىنىڭ بيىك ماقساتتارىنا قول جەتكىزۋدىڭ باستى شارتى.

بۇل ماڭگىلىك قۇندىلىقتار ەلىمىزدىڭ وركەندەۋىنىڭ سەنىمدى نەگىزى بولىپ تابىلادى.

تاريحىمىزدىڭ قاسىرەتتى بەتتەرى، ساياسي قۋعىن-سۇرگىن جانە اشارشىلىق قۇرباندارى ءارقاشان ءبىزدىڭ جادىمىزدا جانە ونى ۇمىتپاۋ ءبىزدىڭ قاسيەتتى بورىشىمىز»، - دەلىنگەن ەلباسى ۇندەۋىندە.