توزاقتان قورقۋدىڭ قاجەتى جوق

 استانا.قازاقپارات - مۇسىلماندىق ىلىمدە توزاق - كۇناھارلار مەن دىنسىزدەردىڭ و دۇنيەدە جازالاناتىن ورنى. قۇران كارىمدە كۇناھارلار مەن دىنسىزدەردىڭ توزاق وتىندا جاناتىنى ايتىلادى.

ولارعا تاماق ورىنىنا جاھاننام تۇبىندە وسەتىن زاققۇم اعاشى، سۋسىن رەتىندە قايناپ تۇرعان سۋ بەرىلەتىن كورىنەدى.

 بۇل دۇنيەدە جاساعان كۇناسىنە قاراي توزاق جازاسى دا ءارتۇرلى بولاتىن كورىنەدى. توزاق بىرنەشە قاباتتان تۇرادى ەكەن. توزاقتىڭ ءار قاباتىندا پەندەگە كۇناسىنە وراي جازا بەرىلەدى دەسەدى.

 دەسە دە، توزاقتان قورقۋعا بولمايدى. ەگەر ءسىز كۇنا جاساماي، اللا ءامىر ەتكەن امالداردى ورىنداپ جۇرسەڭىز توزاق وتىنا تۇسپەيسىز.

 توزاق تۋرالى

 بىردە پايعامبارىمىزعا (س. ع. س. ) ءوڭى قۋارىپ ءجابىرايىل (ع. س. ) كەلەدى. راسۋلۋللاھ (س. ع. س. ) وعان: «ەي، ءجابىرايىل (ع. س. ) ! ءوڭىڭ سولعىن عوي؟ » دەيدى. سوندا ءجابىرايىل (ع. س. ) : «ۋا، مۇحاممەد (س. ع. س. ) ! اللاھ تاعالانىڭ ۋادە ەتكەن قيامەت كۇنى حاق. توزاق وتى، قابىر ازابى حاق، اللاھ تاعالانىڭ ازابى زور دەپ بىلگەن جاننىڭ وسىلارعا يلانباي تۇرىپ، شاتتانىپ- قۋانۋى -  ابەستىك» دەدى.

جاھاننام قانداي بولادى؟

راسۋلۋللاھ (س. ع. س. ) : «ۋا، ءجابىرايىل (ع. س. ) ! ماعان ءجاھاننامدى سيپاتتاپ بەرشى» دەدى. ءجابىرايىل (ع. س. ) : «ايتايىن، راسىندا، اللاھ تاعالا ءجاھاننامدى جاراتقان كەزدە ول قاشان قىزارعانعا دەيىن مىڭ جىل، ودان اعارعانعا دەيىن مىڭ جىل، قارايعانعا دەيىن تاعى مىڭ جىل جاقتى. سوڭىندا ءجاھاننام وتىنىڭ جالىنى مەن شوعى وشپەستەي زۇلمات قاراڭعى تۇنەككە اينالدى.

سەنى پايعامبار (س. ع. س. ) ەتىپ جىبەرگەن حاق تاعالامەن انت ەتەم! ەگەر ءجاھاننام ينەنىڭ ساڭىلاۋىنداي اشىلسا، ونىڭ ىستىعىنان بۇكىل دۇنيەدەگى تىرشىلىك يەسى كۇيىپ كەتەر ەدى.

سەنى پايعامبار (س. ع. س. ) ەتىپ جىبەرگەن حاق تاعالامەن انت ەتەم! ەگەر توزاقتىقتاردىڭ كيىمىنەن ءبىر كيىم اسپان مەن جەر اراسىندا ىلىنەر بولسا، ونىڭ ىستىعى مەن ساسىق ءيسىن سەزىنگەن جەر بەتىندەگى بارلىق جان يەسى ءولىم قۇشار ەدى.

سەنى پايعامبار (س. ع. س. ) ەتىپ جىبەرگەن حاق تاعالامەن انت ەتەم! اللاھ تاعالا قۇران كارىمدە ايتقان توزاق شىنجىرىنان ءبىر كەزىن لازاب تاۋىنىڭ ۇستىنە قويار بولسا، تاۋدى تەسىپ، جەتى قابات جەردەن وتەر ەدى.

سەنى پايعامبار (س. ع. س. ) ەتىپ جىبەرگەن حاق تاعالامەن انت ەتەم! ەگەر توزاقتىڭ باتىسى تاراپىندا ءبىر ادام ازاپقا تارتىلسا، سول ازاپتىڭ ۇشقىنى شىعىستاعى بىرەۋگە دە جەتەر ەدى.

 توزاق وتىنىڭ ىستىعى قاتتى، شۇڭقىرى تەرەڭ، تورى تەمىردەن، سۋسىنى قايناعان سۋ مەن قاندى ءىرىڭ، كيىمى وتتان جاسالعان. توزاقتىڭ جەتى ەسىگى بار. ءار ەسىگى ەركەگى مەن ايەلى ارالاس ءار ءتۇرلى توپتارعا ارنالعان» دەدى.

 سوندا پايعامبارىمىز (س. ع. س. ) : «ونىڭ ەسىكتەرى ءبىزدىڭ مىنا ەسىكتەر سياقتى ما؟ » دەپ سۇرادى.

ءجابىرايىل (ع. س. ) : «جوق، ءبىراق ونىڭ ەسىكتەرى ءارقاشان اشىق. بىرىنەن ءبىرى تومەن ورنالاسقان. ءبىر ەسىكتەن كەلەسى ەسىككە دەيىن جەتپىس جىلدىق جول جانە ءار ەسىك وزىنە جاقىن ورنالاسقان ەسىكتەن جەتپىس ەسە ىستىق» دەدى.

توزاقتا ادامدار قالاي ازاپتالادى؟

ءجابىرايىل (ع. س. ) اللاھ تاعالانىڭ دۇشپاندارى توزاققا قاراي ايدالاتىنىن ايتتى. «ولار توزاق ەسىگىنە جاقىنداعاندا الدارىنان ءزابانيا (توزاقتاعى ازاپ پەرىشتەلەرى) كىسەن- شىنجىرمەن قارسى الادى. ازاپتالۋشىنىڭ اۋزىنان كىرگەن شىنجىر، ارتىنان شىعادى. سول قولى موينىنا قايىرىلىپ، وڭ قولى كەۋدە تۇسىنان كىرگىزىلىپ، جاۋىرىنىنىڭ ورتاسىنان شىعارىلىپ كىسەندەلەدى. ءاربىر پەندە شايتانعا جاقىن ەتىپ بايلانادى. جۇزىمەن سۇيرەلەدى. پەرىشتەلەر ونى تەمىردەن جاسالعان كۇرزىمەن ۇرادى. ولار ول جەردەن قانشا تىربانىپ قاشسا دا، قايتادان ورنىنا اكەلىنەدى» دەدى.

اۆتور: قالدار كومەكبايەۆ

«الاش ايناسى»