ت م د ەلدەرىنىڭ ۇكىمەت باسشىلارى ءبىرقاتار كەلىسىمدەرگە قول قويدى
وتىرىستا دوستاستىق ەلدەرىنىڭ ءوزارا ءىس-قيمىلىن تەرەڭدەتۋگە باعىتتالعان جيىرماعا جۋىق ماڭىزدى ەكونوميكالىق، گۋمانيتارلىق جانە ۇيىمداستىرۋ ماسەلەسى قارالدى.
ناقتى ايتقاندا، 2020 - جىلعا دەيىن ت م د قاتىسۋشى مەملەكەتتەردىڭ يننوۆاتسيالىق ىنتىماقتاستىعى مەملەكەتارالىق باعدارلاماسى مەن ونى جۇزەگە اسىرۋ بويىنشا 2012-2014 -جىلدارعا ارنالعان ءىس-شارالار كەشەنىنىڭ 2013 - جىلى ورىندالۋ بارىسى تالداندى.
ءوز سوزىندە ب. ساعىنتايەۆ اتاپ وتكەندەي، «ەكونوميكا سالاسىندا نەگىزگى مىندەتتەر يننوۆاتسيالىق ىنتىماقتاستىقتى كۇشەيتۋ، سونداي-اق جالپى اۋىل شارۋاشىلىعى نارىعىن دامىتۋ جانە ت م د قاتىسۋشى ەلدەردىڭ ازىق- تۇلىك قاۋىپسىزدىگىن قامتاماسىز ەتۋ بولىپ تابىلادى» .
عىلىمي-تەحنيكالىق اقپاراتتى مەملەكەتارالىق الماسۋ سالاسىنداعى ىنتىماقتاستىق پەن كولىك قاۋىپسىزدىگىن قامتاماسىز ەتۋ سالاسىنداعى تمد مەملەكەتتەرىنىڭ اقپاراتتىق ءوزارا ءىس-قيمىلىن رەگلامەنتتەيتىن كەلىسىمدەرگە قول قويىلدى. سونداي-اق، راديوناۆيگاتسيا جانە گيدرومەتەورولوگيا سالاسىنداعى ءوزارا ءىس-قيمىلدى دامىتۋ بويىنشا شارالار بەلگىلەنىپ، تاۋارلاردىڭ شىققان ەلىن انىقتاۋ ەرەجەلەرىنە وزگەرتۋلەر ەنگىزىلدى.
بۇدان وزگە، گۋمانيتارلىق سالاداعى ىنتىماقتاستىق ماسەلەلەرى قارالدى. ت م د ەلدەرىندەگى ۇلتتىق سپورت تۇرلەرىن دامىتۋعا، دوستاستىق ەلدەرىندە مالدىڭ اۋسىلمەن اۋىرۋىنىڭ تارالۋ قاۋپىمەن كۇرەسكە باعىتتالعان شارالار ازىرلەندى.
قاۋىپسىزدىكتى قامتاماسىز ەتۋ سالاسىندا كامەلەتكە تولماعانداردىڭ وزدەرىنىڭ تۇراقتى ءومىر سۇرەتىن مەملەكەتتەرىنە قايتۋىنا، تابيعي جانە تەحنيكالىق سيپاتتاعى توتەنشە جاعدايلاردىڭ سالدارىن جويۋعا، قارۋلى كۇشتەردى توپوگەودەزيالىق جانە ناۆيگاتسيالىق قامتۋعا، سونداي-اق گۋمانيتارلىق ميناسىزداندىرۋ سالاسىنداعى ت م د مەملەكەتتەرى قارۋلى كۇشتەرىنىڭ ينجەنەرلىك اسكەرلەرىنىڭ ىنتىماقتاستىعىنا قاتىستى ماسەلەلەر تالقىلاندى.
ت م د ۇ ب ك كەلەسى وتىرىسى اعىمداعى جىلدىڭ 21 - قاراشاسىندا اشحابادتا وتەدى.
