سلاۆيانسكىدە ۋكراينا تىكۇشاعىن اتىپ ءتۇسىردى
ءبىراق قازا تاپقاندار تۋرالى اقپاراتتار ءارتۇرلى.
ۋكراينا پارلامەنتى سپيكەرى الەكساندر تۋرچينوۆ 14 ادام قازا تاپتى دەيدى. ال ۋكراينا ۇلتتىق گۆاردياسى 12 جاۋىنگەر مەرت بولعانىن ايتادى. ۋكراينا قارۋلى كۇشتەرىنىڭ اسكەري وپەراتسيالار شتابىنىڭ باسپا ءسوز حاتشىسى ۆلاديسلاۆ سەلەزنيەۆ «قۇربان بولعاندار - 10 ادام» دەپ مالىمدەدى.
قازا تاپقاندار اراسىندا ۇلتتىق گۆارديانىڭ اسكەري جانە ارنايى دايىندىق باسقارماسى باستىعى، گەنەرال-مايور سەرگەي كۋلچيتسكي بار.
ۋكراينا اسكەرى 29-مامىر كۇنى دونەتسك وبلىسى مەن قالاسىندا انتيتەرورلىق وپەراتسيالاردى جالعاستىرعان. سەپاراتيستەرگە قارسى وپەراتسيا بارىسىندا سلاۆيانسك جانە كراماتورسك قالالارى ماڭىندا ۋكراينا اسكەرى ارتيللەريا مەن اۆياتسيانى قولدانىپ جاتىر. قورعانىس ءمينيسترىنىڭ مىندەتىن اتقارۋشى ميحايل كوۆالدىڭ ايتۋىنشا، قارۋلى كۇشتەر ەلدىڭ شىعىسىندا وپەراتسيانىڭ بەكىتىلگەن جوسپارى بويىنشا ارەكەت ەتىپ جاتىر.
الەكساندر تۋرچينوۆ پارلامەنتتە تىكۇشاق «رەسەيلىك پورتاتيۆتى زەنيتتىك زىمىرانمەن اتىپ تۇسىرىلگەنىن» ايتتى.
ا ق ش پرەزيدەنتى اكىمشىلىگى بۇل اقپاراتتان سوڭ رەسەيشىل سەپاراتيستەردىڭ سىرتتان «سوڭعى ۇلگىدەگى زاماناۋي قارۋ-جاراق الىپ وتىرعانىن» مالىمدەدى.
29-مامىر كۇنى كەشكە PBS تەلەارناسىنان سويلەگەن ا ق ش مەملەكەتتىك حاتشىسى دجون كەرري «ۋكراينامەن شەكاراداعى رەسەي اسكەرى كەرى قايتارىلىپ جاتقانىن» ايتىپ، ءبىراق «دايىندىقتان وتكەن رەسەيلىكتەردىڭ ۋكراينا اۋماعىنا ەنىپ كەتىپ جاتقانى الاڭداتاتىنىن» مالىمدەدى.
«ازاتتىق»
