الماتىدا مانەرلەپ سىرعاناۋدان ءتورت قۇرلىقتىڭ وليمپيادا چەمپيوندارى ونەر كورسەتتى- فوتو

 الماتى. قازاقپارات - الماتىدا قازاقستاندىق مانەرلەپ سىرعاناۋشى، سوچيدەگى وليمپيادالىق ويىنداردىڭ قولا جۇلدەگەرى دەنيس تەننىڭ «دەنيس تەن جانە ونىڭ دوستارى. وليمپيادالىق جىگەر» اتتى مۇز ايدىنىنداعى وراسان زور شوۋى ءوتتى.

 شوۋعا مانەرلەپ سىرعاناۋدان ءتورت قۇرلىقتىڭ وليمپيادا چەمپيوندارى، الەم، ەۋروپا چەمپيوندارى قاتىستى.

ولاردىڭ اراسىندا توعىز وليمپيادا جۇلدەگەرلەرى - دجوانني روشەتت، كارولينا كوستنەر، ماو اسادا، ميراي ناگاسۋ، ەۆان لايساچەك، دايسۋكە تاكاحاشي، ستەفان لامبەل، تاتيانا ۆولوسوجار جانە ماكسيم ترانكوۆ بولدى. الەمنىڭ ءتورت دۇركىن چەمپيونى، ەۋروپانىڭ ءۇش دۇركىن چەمپيونى الەكسەي ياگۋدين جانە ەكى مارتە الەم چەمپيوندارى ماكسيم مارينين مەن تاتيانا توتميانينا ارنايى قوناقتار قاتارىنان ورىن الدى.

مۇز ايدىنىنداعى شوۋ ەكى بولىمنەن تۇرادى. ونىڭ العاشقى بولىمىندە مانەرلەپ سىرعاناۋشىلار سەرپىندى نومىرلەردى كورسەتتى، ەكىنشىسىندە - كەيبىر ونەر كورسەتۋشىلەر سيمفونيالىق وركەستردىڭ سۇيەمەلدەۋىمەن زور اسەر قالدىردى. كەشتى جۇرگىزۋشىلەر - نۇرلان ابدۋللين مەن نۇرلان قويانبايەۆ. شارانىڭ ەكىنشى بولىگىندە ولارعا الەكسەي ياگۋدين قوسىلدى.

 ءاربىر سپورتشى ءوزىنىڭ ۇزدىك نومىرلەرىن پاش ەتتى. د. تەننىڭ ءوزى دە تاماشا ويىن ورنەگىن كورسەتىپ، كۇردەلى ەلەمەنتتەرگە قۇرالعان كومپوزيتسيالاردى ۇسىندى. كورەرمەندەر زالى وعان تۇرەگەپ تۇرىپ قول سوقتى. شوۋدىڭ سوڭىندا مانەرلەپ سىرعاناۋشى بارلىق قاتىسۋشىلارعا، دوستارى مەن جانكۇيەرلەرىنە قولداۋلارى ءۇشىن العىس ايتتى. ونىڭ ايتۋىنشا، تۇسكەن بارلىق قاراجات قازاقستاندا مانەرلەپ سىرعاناۋ سپورتىن دامىتۋعا جۇمسالادى.