اۋرۋ بالا قايدان شىعادى؟

استانا. قازاقپارات - ۇلت ساۋلىعى. دۇنيەگە دەنى ساۋ ءسابي اكەلۋ -  ءار ايەلدىڭ ارمانى. دەگەنمەن، بۇگىنگى تاڭدا بۇيرەك اۋرۋى، قان ازدىعى، قالقانشا بەزىنىڭ پاتولوگياسى مەن قورشاعان ورتاداعى سۋدىڭ ساپسىزدىعى ىشتەگى ۇرىققا دا اسەر ەتەدى.

سونىڭ سالدارىنان قۇرساقتاعى شارانا تولىق دامىمايدى، جەتىلمەيدى.

ال، قانمەن، قورەكتىك زاتتارمەن تولىق قامتاماسىز ەتىلمەگەن نارەستەنىڭ تۋعاننان كەيىن دەنساۋلىعى ناشار بولادى.

قۇرساقتاعى بالانىڭ دۇرىس قالىپتاسۋى ءۇشىن جۇكتى ايەل دۇرىس ءارى ۋاقىتىلى تاماقتانۋى كەرەك.

ياعني، كۇنىنە كەمىندە 70-100 گرام ەت تاعامدارىن جەۋ كەرەك. بۇرشاق داقىلدارى، ءسۇت ونىمدەرىن اس مازىرىنە قوسقان ءجون. سونىمەن قاتار، 400 گرام جەمىس پەن كوكونىس ونىمدەرىن جەپ تۇرعان ابزال.

بولاشاق انا تاماقتانعاننان سوڭ، 2 ساعاتقا دەيىن شاي ىشپەۋى كەرەك. شايدىڭ ورنىنا توساپ، قايناعان سۋ، شىرىن ىشكەن ءجون. ويتكەنى، شايدىڭ قۇرامىنداعى تانين تاعامنان بولىنەتىن تەمىردىڭ سىڭۋىنە كەدەرگى جاسايدى. تەمىردىڭ جەتىسپەۋشىلىگى قان ازدىعىنا اكەپ سوعادى. ءوز كەزەگىندە، قان ازدىعى ۇرىق پەن بولاشاق نارەستەنىڭ دامۋىنا كەدەرگى جاسايدى.

جاتىرداعى بالانىڭ دۇرىس دامۋىن قامتاماسىز ەتۋ - ايەلدىڭ باستى مىندەتى.

دەنى ساۋ ءسابيدى دۇنيەگە اكەلۋ ءۇشىن ەرلى-زايىپتىلارعا جوسپارلى جۇكتىلىككە دەيىن مىندەتتى تۇردە مەديتسينالىق تەكسەرۋدەن ءوتۋ كەرەك؛

ءزۇليپا ازىرەتالى قىزى، پسيحولوگ:

- قىز بالا 13 جاستان اسقان سوڭ ونىڭ بويىندا وزگەرىستەر پايدا بولادى. بۇل - بولاشاق انا بولۋدىڭ العاشقى بەلگىلەرى. وسى ساتتەن باستاپ، قىزدار وزدەرىنىڭ دەنساۋلىقتارىنا دۇرىستاپ قاراۋى كەرەك.

ياعني، تازالىق دەگەن ءسوزدىڭ ءمانىن تۇسىندىرگەن ابزال. 15 جاستان اسقان سوڭ بويجەتكەندەر گينەكولوگتىڭ قابىلداۋىنا بارىپ تۇرۋ كەرەك. بۇل دا ماڭىزدى. سەبەبى، كەيبىر جاعدايلاردى ولار انالارىنا، قۇربىلارىنا ايتا المايدى. مىنە، وسى كەزدە ەشبىر قىمسىنباي، گينەكولوگتىڭ نەمەسە پسيحولوگتىڭ كومەگىنە جۇگىنۋگە بولادى.

اشىق اڭگىمە ارقاسىندا قىزدار وزدەرىنە كوپتەگەن قاجەتتى اقىل-كەڭەستەر الادى. بۇل - قىزداردى انا بولۋعا دايىنداۋدىڭ بىردەن-ءبىر ءتيىمدى جولى. قىز بالانى كىشكەنتاي كەزىنەن باستاپ ار- نامىسىن تۇمارىنداي ساقتاپ، جەكە باسىنىڭ گيگيەناسىنا اسقان جاۋاپكەرشىلىكپەن قاراۋعا ۇيرەتۋ كەرەك. سول كەزدە عانا قوعامدا كەڭىنەن تاراي باستاعان جاساندى تۇسىك جاساتۋ، تاستاندى بالا دەگەندەي ۇلكەن كەمشىلىكتەردىڭ تۇبىنە بالتا شابىلادى.

 - انانىڭ بويىنا بالا بىتكەنگە دەيىن جانە جۇكتىلىك كەزىندە سالاۋاتتى ءومىر سالتىن قالىپتاستىرىپ، زياندى ءارى جۇيكەنى توزدىراتىن جۇمىستان بويىن اۋلاق ۇستاعانى ءجون.

- بولاشاق انا جۇكتىلىكتىڭ 12 - ءشى اپتاسىنا دەيىن ايەلدەر كەڭەسىنە ەسەپكە تۇرىپ، بوسانعانشا كەم دەگەندە 4-5 رەت دارىگەردىڭ قابىلداۋىندا بولۋى كەرەك.

ەلميرا قوجاحمەتوۆا، شىمكەنت قالالىق №1 ايەلدەرگە كەڭەس بەرۋ ورتالىعىنىڭ اكۋشەر- گينەكولوگى:

- ەمحانالاردا، ايەلدەر كەڭەسىندە وتباسىن قۇرۋ كابينەتى جۇمىس ىستەيدى. بۇل جەردە بىلىكتى ماماندار بالالى بولۋدىڭ ءمان- ماڭىزىن ايتىپ بەرەدى. ەرلى- زايىپتىلار الدىن الا مەديتسينالىق تەكسەرۋدەن ءوتىپ، ءوز دەنساۋلىقتارىن تەكسەرىپ الۋ مۇمكىندىگىنە يە بولادى. سونىمەن قاتار گەنەتيك ماماندارمەن دە كەڭەسىپ، ءتۇرلى اۋرۋلاردىڭ پايدا بولۋ سەبەپتەرى جايىندا مالىمەت الىپ، ولاردى بولدىرماۋدىڭ جولدارى قاراستىرىلادى.

بۇل دەگەنىمىز - بالالى بولۋعا ۇلكەن جاۋاپكەرشىلىكپەن قاراۋدىڭ باستى باسپالداعى. ياعني، ەرتەڭگى كۇندى بۇگىن ويلاۋ دەگەن ءسوز. بۇل دا جاس وتباسى ءۇشىن اسا قاجەتتى كومەك. وسىنىڭ بارلىعىن پايدالانۋ كەرەك.

اياعى اۋىر ايەلدەردىڭ بارلىعى بىردەي ۋاقىتىمەن ەسەپكە تۇرادى دەپ ايتۋ قيىن. ءتۇرلى سەبەپتەرگە بايلانىستى 3-4، ءتىپتى 5-6 اي بولعان كەزدىڭ وزىندە كەلەتىن بولاشاق انالار بار.

بۇل دەگەنىمىز التىن ۋاقىتتى وتكىزىپ الۋ. ياعني، باسىندا جاسالاتىن ەم-شارانىڭ كوبى قالىپ قويادى. اياعى اۋىر ايەلدىڭ اعزاسىندا وزگەرىس كۇندە بولىپ تۇرادى، ءتىپتى، ساعات سايىن دەسە دە بولادى. سوندىقتان دا ۋاقىتىمەن تەكسەرۋگە كەلىپ تۇرۋعا ولار مىندەتتى. بۇل الدىمەن انانىڭ دەنساۋلىعى مەن ىشتە جاتقان شارانانىڭ دامۋىن قاداعالاۋعا ۇلكەن مۇمكىندىك بەرەدى.

 

اۆتور: ايجان ەرمەك قىزى

  

Otyrar