ۆەنگرلەر قازاقستاندا ايازعا جانە ءزىلزالاعا توتەپ بەرە الاتىن تۇرعىن ۇيلەردى سالۋعا نيەتتى
وسى ساپار الدىندا وبلىس اكىمىنىڭ ءبىرىنشى ورىنباسارى ەرمەك كوشەربايەۆ ۆەنگريانىڭ الماتى قالاسىنداعى باس كونسۋلى فەرەنتس بلاۋمان مەن ونىڭ سىرتقى ەكونوميكالىق بايلانىستار بويىنشا كەڭەسشىسى يشتۆان ماكراليدى قابىلدادى.
كەزدەسۋ بارىسىندا وسكەمەندە بولاشاقتا سالىنۋى مۇمكىن ءۇي- قۇرىلىسى كومبيناتىنا ينۆەستور تارتۋ ماسەلەلەرى، سونىمەن قاتار، ۆەنگرلىك كومپانيالار ۇسىنىپ وتىرعان شىعىنى از، شاعىن سۋ ەلەكتر ستانتسيالارىنىڭ جوبالارى قارالدى. ۆەنگرلىك كونسۋلدىڭ ايتۋىنشا، ۇسىنىلىپ وتىرعان جوبالار ارقىلى ءوڭىر تۇرعىندارىن، اۋىل شارۋاشىلىعى سالاسىن، تۋريستىك كەشەندەردى، ءتىپتى، ءوندىرىس نىساندارىن دا ارزان ەلەكتر ەنەرگياسىمەن قامتۋعا بولادى.
ەرمەك كوشەربايەۆ ءوز سوزىندە ۆەنگريانىڭ استاناسى بۋداپەشت قالاسىندا ابايدىڭ ەسكەرتكىشىن اشۋ جۇمىستارىنا اتسالىسقاندارى ءۇشىن ەلشىلەرگە العىسى شەكسىز ەكەندىگىن ايتتى.
«ەلىمىزدىڭ ۇكىمەت باسشىسى ۆەنگرياعا جاساعان ساپارىندا بۋداپەشت قالاسىنىڭ ورتالىعىنا اباي ەسكەرتكىشىن ورناتۋ ماسەلەسىن قوزعاعان بولاتىن، سىزدەردىڭ تاباندى ەڭبەكتەرىڭىزدىڭ ارقاسىندا ۇلى اقىننىڭ ەسكەرتكىشى ۆەنگريادا بوي كوتەرەتىن بولدى» ، - دەدى وبلىس اكىمىنىڭ ءبىرىنشى ورىنباسارى.
فەرەنتس بلاۋمان شىعىسقا ءبىرىنشى رەت كەلىپ تۇرعانىن، بۇل ءوڭىردىڭ تابيعي رەسۋرستارعا باي ەكەندىگىن جەتكىزدى. ونىڭ ايتۋىنشا، ەكى ەل اراسىنداعى بايلانىس ارقىلى ۇتىمدى ەكونوميكالىق جوبالاردى جۇزەگە اسىرۋعا بولادى. ونىڭ ىشىندەگى ەڭ نەگىزگىلەرى - قۇرىلىس، اۋىل شارۋاشىلىعى جانە ەنەرگەتيكا سالالارى.
«جۋىقتا قازاقستاندىق دەلەگاتسيا ۆەنگرياعا بارادى دەپ كۇتىلۋدە. بۇل ساپار بارىسىندا كوپتەگەن ەكىجاقتى كەلىسىمدەرگە قوي قويىلادى دەپ ۇمىتتەنەمىز. ءبىزدىڭ اكەلىپ وتىرعان جوبالارىمىزدان باسقا سىزدەردى قىزىقتىراتىن كوپتەگەن يدەيالارىمىز بار. ۆەنگريانىڭ قازاقستانعا ەكسپورتى قازىر 210 ميلليون ا ق ش دوللارىن قۇراپ وتىر، بۇل كورسەتكىش الداعى ۋاقىتتا ءالى دە ۇلعايا تۇسەدى دەپ ويلايمىن. ۆەنگريا قازىر اگرارلىق ەلدەن ونەركاسىپتىك مەملەكەتكە اينالىپ كەلە جاتىر. شىعىس قازاقستان وبلىسىنىڭ ايماعىندا تاۋلى وزەندەر وتە كوپ. شاعىن سۋ ستانتسيالارىن سالۋ سىزدەر ءۇشىن وتە ءتيىمدى» ، - دەدى فەرەنتس بلاۋمان.
كونسۋلدىڭ كەڭەسشىسى يشتۆان ماكرالي ۆەنگرلىك جوبالاردىڭ ىشىندە ءۇي- قۇرىلىس كومبيناتىن سالۋ دا بار ەكەندىگىن اتاپ ءوتتى.
«ءبىز قابىرعالارى جىلدام قۇراستىرىلاتىن، سەيسميكالىق ءتوزىمدى، سىزدەردىڭ ايازدى قىستارىڭىزعا توتەپ بەرە الاتىن، جىلۋدى جاقسى ۇستايتىن ۇيلەر قۇراستىرا الامىز. جوبادا ەكى قاباتتى كوتتەدجدەر دەپ كورسەتىلگەن، ونى كوپقاباتتى تۇرعىن ۇيلەرگە اۋىستىرۋعا بولادى» ، - دەدى يشتۆان ماكرالي.
اۆتور: جاسۇلان جولدىبايەۆ
