مەملەكەت باسشىلارى دەڭگەيىندەگى جوعارى ەۋرازيالىق ەكونوميكالىق كەڭەستىڭ وتىرىسى باستالدى
وتىرىستىڭ شاعىن قۇرامداعى كەزدەسۋىنە قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ، رەسەي فەدەراتسياسىنىڭ پرەزيدەنتى ۆلاديمير پۋتين جانە بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو قاتىسۋدا.
توقتالا كەتەتىن جايت، شاعىن قۇرامداعى كەزدەسۋدەن سوڭ كەڭەس جۇمىسى كەڭەيتىلگەن قۇراممەن جالعاساتىنى كۇتىلۋدە. وعان ءۇش مەملەكەت باسشىلارىنان بولەك، باقىلاۋشى- مەملەكەتتەر باسشىلارى ارمەنيا رەسپۋبليكاسىنىڭ پرەزيدەنتى سەرج سارگسيان مەن قىرعىز رەسپۋبليكاسىنىڭ پرەزيدەنتى المازبەك اتامبايەۆ قاتىساتىن بولادى.
بۇدان بۇرىن دا حابارلاعانىمىزداي، مەملەكەت باسشىلارىنىڭ دەڭگەيىندەگى جوعارى ەۋرازيالىق ەكونوميكالىق كەڭەستىڭ وتىرىس قورىتىندىسى بويىنشا قازاقستان، رەسەي مەن بەلارۋس اراسىندا ەۋرازيالىق ەكونوميكالىق وداق قۇرۋ تۋرالى شارتقا قول قويىلادى دەپ جوسپارلانىپ وتىر. اتالعان وداق تۋرالى كەلىسىم 2015 - جىلدىڭ 1 -قاڭتارىنان باستاپ كۇشىنە ەنەدى.
سونىمەن قاتار، كەلىسسوزدەردە ەۋرازيالىق ينتەگراتسيالىق ۇدەرىس اياسىن كەڭەيتۋ ماسەلەسى دە قارالماق. اتاپ ايتقاندا، ارمەنيانىڭ ەۋرازيالىق ەكونوميكالىق وداققا قوسىلۋى تۋرالى شارتتىڭ دايىندالۋ بارىسىن تالقىلاۋ جوسپارلانىپ وتىر. سونىمەن قاتار، قىرعىز رەسپۋبليكاسىنىڭ كەدەن وداعىنا قوسىلۋى جونىندەگى جول كارتاسى قارالادى دەپ كۇتىلۋدە. بۇدان بولەك، مەملەكەت باسشىلارىنىڭ قاتىسۋىمەن كەدەن وداعى مەن ءبىرىڭعاي ەكونوميكالىق كەڭىستىكتى دامىتۋدىڭ نەگىزگى ماسەلەلەرى جونىندەگى ءبىرقاتار وزەكتى تاقىرىپتار تالقىلاناتىنى كۇتىلەدى.
اۆتور: قانات مامەتقازى ۇلى
